-Almmuhus-
-Almmuhus-
OĐĐASATDovdá stuora vuordámušaid

Dovdá stuora vuordámušaid

-

-

Kárášjohkalaš Silje Máret Somby ii leat áibbas oahpis buot beatnagiidda ráiddus, ja ballá dat sáhttá goazahit su gilvvus. Odne vuoddjái son Álttás FL500 gilvvus.

Kárášjohkalaš Silje Máret Somby  (24) lea okta dan 70 beanavuoddjis geat FL 500 gilvvus odne vuoddjáje Álttás. Son lea dál nuppes dáin gilvvuin. Diibmá lei searvan vuohččan, ja bođii gávccádin FL500 -gilvvus.

 

Ovdal go vuoddjái beatnagiiguin Álttás lávvordaga beaivet, logai son iežas leat vehá balus.

– Dovddan ahte leat ollu vuordámušat buohkain go diibmá manai nu bures. Mus maid ii oro áibbas buorre beanaráidu. Lean moadde beatnaga šaddan luoikkahit. Lea leamaš váttis válljet beatnagiid, go dál eai lean mus go guokte beatnaga main ii lean makkárge sivva. Leat iešguđet sivat nugo hávit, lean amas daidda, ja ahte eai  gaikko albmaládje. Dat buktá eambbo barggu munnje, váruhit ja dikšut daid, dadjá son.

 

Silje Máret lohká čavčča ja dálvvi ráhkkanan gilvvuide, muhto lea ferten golbma beatnaga heaitit atnimis gilvvuin, go eai nagodan šat doalahit leavttu. Dál lea luoikkahan nuorat beatnagiid.

 

Mentála geahččaleapmi

Stuorámus hástalussan go vuodjá dákkár guhkes gilvvuid, lohká son leat movtta doalahit.

– Dákkár gilvvut leat mentála geahččalussan, fertet oppaáigge váruhit ja doalahit buori miela. Jus beatnagat gullet don leat váiban dahje suhttan, dat njoammu daidda. Muđui ferte oppaáigge ieš birget. Nugo diibmá go mus doddjui okta oassi reagas ovdalaš Máze. Mus lei lihkus streanga mielde, ja fertejin ieš divvut dan. Ledjen veháš MacGyver de, boagusta son.

 

Ballá virusa njoammut

Dál lea sus mihttun čađahit gilvvuid, go diibmá ii ollen bealli ge mollii.

– Ja de sávan dieđusge ahte beatnagat eai buohccá, go dál lea okta virus mii njoammu vuodjinbeatnagiid gaskka mainna vukset ja luhčot. Mu beatnagiin ii leat leamaš dat virus. Livččen muđui njoammudahttán daid vai gerget dávddain ovdal gilvvuid, muhto gullen dan birra easkka vahkku áigi, dadjá Silje Máret Somby.

 

20 bajimusa searvái

FL 500 gilvvus lea maid nubbi kárášjohkalaš, Børge Johansen, gii lea nuppi beanavuoddji, Biret Astrid Utsi, ovttasássi.


BUORET BEATNAGAT JA BUORRE DOVDU: Kárášjohkalaš Børge Johansen lea duhtavaš beatnagiiguin, ja sávvá beassat buoremus 20 searvái. Marit Elin Kemi

Son lea viđa háve searvan ja ollen mollii guktii. Dál lea sus buorre jáhkku lihkostuvvat, vaikko ii leat nu olu šaddan hárjehallat.

– Dán jagi gal ferten mollii ollet. Mus leat buoret beatnagat maid dál, mat leat hárjánan vuodjit. Daiguin lea Biret Astrid maid vuodján 15. ja 18. sadjái maŋmeus jagiid. Diekko livččii mihttu dán jagi ollet mollii.

 

Oaivvi geavahit 

Børge lohká ođđa lahttu Finnmarksløpet gilvvuin, dahká ahte ferte jurddašit vel eambbo movt vuodjá.

– Ii sáhte dušše girddihit. Ferte álggus siivvožit vuodjit Jergulii, ja das viidáseappot sáhttá de vehá garraseappot vuodjit. Ii galgga doapmat, de gal váibada beatnagiid ja dat ii buvtte buori. Beanavuodjima ii sáhte goassege dáhkidit šaddá go nuo ja ná. Sáhttá olu dáhpáhuvvat vuojidettiin.

 

Silje stuora gilvaleaddjin

Son lohká Silje Máreha leat hui stuora gilvaleaddjin dáin gilvvuin.

 – Son sáhttá vuodjit vel garraseappot go lea dahkan ovdal. Sus lea taleanta ja lea čeahppi. Beanavuodjingilvvuin galgá nu olu beliiguin lihkostuvvat, galgá oaidnit beatnagiid ja máhttit muddet leavttu. Muđui gal jáhkán ahte ii oktage birge Harald Tuhneimain, gii vuittii diibmá. Son lea dieđusge stuorimus oiddot dál, dadjá Johansen.

 


VUOITÁ GO DÁN JAGI MAID? Harald Tunheim lea ollen Finnmarksløpet molllii 21 háve, juohke háve logi buoremusa searvvis. Son lea vuoitán sihke FL500 ja FL1200, guđa háve dán rádjai. Dán jagi oaččui maid Seastinbáŋku1 gudnebálkkášumi beanavuodjima ovddas. Marit Elin Kemi

 

 

 

 

 

 

*/

-Almmuhus-