Politiijat dieđihit sis lea olu bargu leamaš dán ija Finnmárkkus.
Hámmárfeasttas lei doarrun odne iđđes diibmu beal gávccis muhtin feasttas. Politiijat leat báikkis ja dutket olbmuid. Sii váruhit ovtta sivalačča, njealjátlot jahkásaš dievddu. Son lea gárremin ja galgá doaruhan muhtin goalmmátlot jahkásaš nieidda. Nieida ii galgga leat roasmmehuvvan gal dán geažil.
Muđui leat Hámmárfeasttas vel dárkkistan gávcci biilla. Ovtta leat váidán áššin, ja okta oažžu ges álkiduvvon sáhku go anii boasttu čuovggaid.
Dorron gáhttagievkkana luhtte
Álttás leat váldán gitta ovtta goalmmátlot jahkásaš dievddu doarruma geažil gávpotguovddážis mannan ija. Su váruhit leat huškon olbmuid gáhttagievkkana vuordinráiddus. Dát dáhpáhuvai birrasiid beal njealji áigge ihkku. Dievddu eai luoitte olggos ovdal go čielgá, čállet politiijat Twitteris.
Árat seamma eahkeda bissehedje politiijat feastta Tollevikas Álttás. Ránnjá dat váidalii go lei alla jietna doppe, ja politiijat fitne viesus bisseheame feastta. Politiijat riŋgejedje vel ovtta vuolleahkásaš bártni eadnái, go lei feasttas vaikko ii leat leat deavdán 18 jagi.
Guovdageainnus gárrenvuoddji
Guovdageainnus leat politiijat bissehan ges ovtta goalmmátlotjahkásaš dievddu gii lei biillain vuodjime. Čájehuvvui ahte sus lea alkohola gorudis go bosui alkomehterii. Son váldui mielde doavtterkantuvrii varrasiskosa dihte, ja politiijat leat álggahan ášši dás.
Báhtarii mopedain
Muđui leat Girkonjárggas geahččalan bissehit guoktása geat leigga mopedain vuodjime. Strømmen šaldi lahka. Muhto soai vuoddjáiga báhtui.
