– Ráđđehus lea hejot meannudan Deanočázádaga báikkiolbmuid, ja dát sáhttá goaridit min kollektiivvalaš rivttiid, lohká presideantaevttohas Ronny Wilhelmsen.
– Ráđđehus lea hejot meannudan Deanočázádaga báikkiolbmuid, ja dát sáhttá goaridit min kollektiivvalaš rivttiid, lohká presideantaevttohas Ronny Wilhelmsen.
Bargiidbellodaga sámediggejoavku háliida ahte Sámediggi galgá ruđalaččat doarjut sin geat leat dieđihan áššečuoččáldahttima Deanosoahpamuša oktavuođas. Šiehtadus Suomain mielddisbuktá stuora váikkuhusaid báikki olbmuid rivttiide, čállá Bargiidbellodaga sámediggejoavku preassadieđáhusas.
– Mii boahtit dasto doarjut dákkár ohcamuša guolástanservviin, áššečuoččáldahttima stáda vuostá. Min ipmárdusa mielde čielggada dákkár diggeášši makkár rivttiid mii oaivvildit báikki olbmuin leat. Nu go soahpamuš lea dál, de mearkkaša dat ahte sámi árbevierru heaittihuvvo ja kollektiivvalaš rievttit goariduvvot, lohká Bargiidbellodaga presideantaevttohas Ronny Wilhelmsen.
– Áššit mat čielgasit gusket Sámediggái
– Ekonomalaš doarjja lea dárbbašlaš vai joavku geat leat dieđihan áššečuoččáldahttima sáhttet dan čađahit. Das sáhttá guhkes rahčamuš boahtit, stáda vuostá. Vuoigatvuođalaččat eai boađe nagodit čađahit diggeášši ruhtadeami haga, go lea nu viiddis ášši, ja garra vuostebealli, namalassii stáhta. Mii oaivvildit maid ahte Sámediggi ii berre dušše juolludit ruđa, muhto maiddái oassálastit bealálažžan go áššis leat olu bealit mat čielgasit gusket Sámedikki ulbmilii ja doaibmaguvlui, lohká Tom Sottinen, Bargiidbellodaga nubbievttohas Nuortaguovllu válgabiires.
