Sámediggeráđđi lea juolludan masá 600 000 ruvnnu guovtti ođđa guolástanfitnodahkii. Sámediggepresideantta mielas lea dehálaš doarjut guolástanealáhusa.
Sámediggeráđđi lea juolludan masá 600 000 ruvnnu doarjaga guovtti ođđa guolástanfitnodahkii.
Hauge Fishing AS Deanus lea ožžon 300 000 ruvnno oastit guolástusfatnasa ja -bargobiergasiid. Fitnodat lea ođđa álggaheaddji ja galgá álgojurdagiin doaimmahit guolásteami Várjjatvuonas.
Holmgren Kystfiske AS Fálesnuoris ges lea ožžon 290 000 ruvnnu oastit guolástusfatnasa ja -bargobiergasiid.
Ovddidit guolástanealáhusa
Sámediggepresideanta mielas lea dehálaš doarjut ja ovddidit ealáhusa.
– Mii leat ilus go sáhttit doarjut doarjagiin ođđa álggaheddjiid ja mii doaivut ahte háhkamušat sáhttet váikkuhit lassi bargosajiide ja árvolassáneapmái min doaibmasuorggis, lohká sámediggepresideanta Silje Karine Muotka (NSR) preassadieđáhusas.
Sihke Deanu gielda ja ovddeš Fálesnuori suohkan leat siskkobealde Sámedikki doaibmasuorggi ja sáhttet ohcat ruhtadoarjaga oastit guolástanfatnasa.
