-Almmuhus-
SMÁVVAOĐĐASATDorjot boahtte giđa eksámeniid šluhttet

Dorjot boahtte giđa eksámeniid šluhttet

-

-

Sámediggi vuorjašuvvá das mo pandemiija lea váikkuhan daid ohppiid oahppanbohtosiidda geain lea sámegieloahpahus.

Sámediggi lea buktán cealkámuša Máhttodepartementii ahte 2022 giđa eksámeniid galggašii šluhttet pandemiija geažil. Sámediggi namuha máŋga dilálašvuođa mat leat dagahan oahpahusa hástaleaddjin sihke ohppiide geain lea oahpahus sámegillii ja dain geain lea sámegieloahpahus.

– Mii diehtit ahte giddejuvvon riikkaráját leat váikkuhan skuvladoaimmaheapmái. Sámegiela oahpaheaddjit, geat ásset Ruoŧas dahje Suomas, eai leat beassan jođašit ovdan ruoktot barggu ja ruovttu gaskka nu mo lávejit, ja oahppit leat dan dihte massán dehálaš oahpahusa. Dasa lassin lea Romssa ja Finnmárkku Stáhtahálddašeaddji čujuhan ahte oahpahusa dábálaš hástalusat leat vearránan, lohká sámediggeráđđi Mikkel Eskil Mikkelsen preassadieđáhusas.

Digitála oahpahus hástalussan

Muhtin skuvllain ja gielddain lea leamaš hástalussan čađahit digitála oahpahusa.

– Digitála oahpahus lea gáibideaddjin skuvllaide mat leat hárjánan sajálaš oahpahussii. Dasa lassin váilot sámi oahpponeavvut, lohká Mikkelsen.

Preassadieđáhusas čállá sámediggeráđđi ahte Sámediggái lea dávistuvvon ahte oahpahus lea gáibideaddji, muhto liikká lea dáhpáhuvvan ahte eksámenat leat čađahuvvon nu go dábálaččat. Muhtin oassi oahpahusas mii lea sámegillii ja sámegieloahpahusas, lea gáiddusoahpahus ja lei jo ollásit digitálalaš ovdal go pandemiija bođii. Muhtin skuvllat lea čađahan oahpahusa measta dábálaččat daid gielddain gos njoammun lea unnán leavvan.

– Liikká fertet geahččat váikkuhusaid das go olles riika leamaš gitta, ja dat lea dagahan dan ahte muhtin oahppit leat olles nuoraidceahki čađahan pandemiija áigodaga. Leat ollislaččat árvvoštallan ja oaidnán ahte dilli lea čuohcan oahppanbohtosii ja dat lei vuođđun min rávvagii, lohká Mikkelsen.

Sámediggi guorrasa Oahpahusdirektoráhta árvvoštallamii ja oaivvilda ahte Máhttodepartemeanta galggašii šluhttet eksámeniid.

-Almmuhus-