-Almmuhus-
-Almmuhus-
-Almmuhus-
OĐĐASATDorjot báhtareddjiid Arábia–Sámi dáhpáhusain

Dorjot báhtareddjiid Arábia–Sámi dáhpáhusain

-

-

INSOMNIA festivála oktavuođas Romssas, lágiduvvo dáhpáhus mas sámi dáiddárat leat mielde čalmmustahttime ja doarjume syrilaš báhtareddjiid geat leat Romssas.

Dán vahkku lágiduvvo Romssas guovttebeaivásaš doalut mat leat gohčoduvvon «Aleppo Strikes Back». Dat lea ovttasbargu arkiteaktaovttastusa FFB, govvejeaddji Samara Sallam, govvadáiddára Lisa Torell ja Small Projects Gallery gaskkas. Sámi arkiteakta Joar Nango, gii lea mielde FFB arkiteaktaovttastusas, muitala sii leat bidjan dán prošeavtta johtui go áigot čalmmustahttet dan stuora báhtareaddjiváttisvuođa mii lea Eurohpás dál.

– Min arkiteaktajoavkkus bargat mii eanas olmmošlaš dásis ja mii lágidit dákkáraš dáhpáhusaid gos mii ávvudit minoritehtaid, ja dál Romssas háliidit mii ávvudit Syria kurdarlaš álbmoga. Mis ii leat vejolaš addit báhtareddjiide orrunlobiid, muhto mii sáhttit čájehit iežamet daguiguin ja olmmošlašvuođain ahte mii leat positiivat go dasa sii leat dáppe. Dánne háliidit mii lágidit dákkáraš Arábialaš/ Sámi/ davvi Norgga deaivvadeami, lohká Nango.

 

Biila mátki

Otne leat álgán vuosttaš dáhpáhusain prošeavttas , mii lea mátkkoštit biillain Oslos Romsii.

 – Ulbmil dainna mátkkiin lea fitnat iešguđetlágan transihtta- ja dorvoohccivuostáiváldinbáikkiin bálgá mielde, ja doppe hupmat geavaheddjiiguin ja dokumenteret movt iešguđetlágan vuostáiváldinbáikkit leat organiserejuvvon. Mátkkis lea maid jurdda ahte iešguđet vuostáiváldinbáikkiin sáhttet kreatiiva syrialaš báhtareaddjit searvat mielde mátkái, ja oassálastet dáhpáhussii Romssas ja suige oahppat nuppiid vásáhusain ja loktet máhtu Norgga servodaga birra, lohká Nango.


Joar Nango, Håvard Arnhoff ja Samara Salam mátkoštit Oslos Romsii. Priváhta govva.

Ráhkada filmma das

 – Syrialaš govvejeaddji ja filbmadahkki Samara Salam, gii ieš lea vuordime vástádusa iežas dorvoohcamuššii Danmárkkus, lea mielde mátkis, ja ráhkada filmma mátkkis. Filbma čuhppojuvvo mátkkis ja čájehuvvo festivála installašuvdnan Small Projects dáiddagalleriijas Romssas, muitala Nango.

 

Báhtareaddjit juo mielde

Nango muitala sii leat oahpásnuvvon 13 báhtareddjiin geat leat juo mielde dáhpáhusas.

 – Sii leat Syrialaš kurdarat ja mis leat earret eará kurdarlaš koahkka, vuoktačuohppi, bivttasgoarru mielde, ja DJ-duo Acid Arab, mat leat vižžojuvvon Parisas. Soai čuojaheaba galleriijas ovdal Insomnia festivála váldoprográmma álgá.

 

Sámi-syrialaš sátnegirjjiin

Sámi poehtat Sigbjørn Skåden ja Niillas Holmberg leaba nai oassin prošeavttas.

 – Sudnos lea lyrihkkaprošeakta mas galgaba galleriijas bargat sámi-syrialaš sátnegirjjiin sihke duorastat ja bearjadat maŋŋilgaskabeaivvi, lohká Nango.

 

-Almmuhus-