-Almmuhus-
OĐĐASATDorjon girjjiid Álttá gonagas­eatnamiid birra 

Dorjon girjjiid Álttá gonagas­eatnamiid birra 

-

-

Sámediggeráđđi lea juolludan 100 000 ruvnno Álttá historjásearvái gieđahallat ja almmuhit gonagaseanagirjjiid. 

– Sverre Eilertsen lea čállán ja almmuhan gonagaseanagirjjiid, muhto ođđa almmuheamis leat ođđa oasit. Earret eará galget systemáhtalaččat geahčadit gos eanaopmodagat leat dál, ja báikenammabarggu oktavuođas lea vejolaš gávdnat eanaopmodagaid ja namaid vai beassá diehtit guđiide báikkiide gonagaseanagirjjit čujuhit, čállá sámediggeráđđi preassadieđáhusas. 

– Prošeakta lea servodatlaččat hui ávkkálaš dan barggu oktavuođas maid Finnmárkokommišuvdna lea álggahan, mii guoská sámi eanaopmodagaid kártemii ja atnui Finnmárkkus, dadjá sámediggepresideanta Silje Karine Muotka (NSR) preassadieđáhusas. 

Álttá historjásearvi áigu oažžut sadjái ollislaš gova báikenamain mat leat geavahuvvon eanaopmodagaid válddahallamis. Dán barggus sii ovttasbarget Álttá Sámi giellaguovddážiin ja Sámi allaskuvllain Guovdageainnus.

– Go geahčada gonagaseanagirjjiid nu go lea jurddašuvvon prošeavttas, de lea buorre ráhkkaneapmi ja dokumentašuvdna barggu hárrái, erenoamážit ovttasbargui Álttá Sámi giellaguovddážiin ja Sámi allaskuvllain sámi báikenamaid birra, loahpaha Muotka.

Doarjja lea juolluduvvon Sámedikki regionálaovddideami doarjjaortnegis.

-Almmuhus-