-Almmuhus-
-Almmuhus-
-Almmuhus-
SMÁVVAOĐĐASATDorjon áppa mas oahppá julev­sámegiela davvi­sámegillii

Dorjon áppa mas oahppá julev­sámegiela davvi­sámegillii

-

-

Sámediggeráđđi lea addán 300 000 ruvnno doarjjan fitnodahkii NA Technologies AS:i Oslos prošektii New Amigos julevsámegiella-davvisámegiella áppa.

NA Technologies AS lea ráhkadan áppa mii fállá sámegieloahpahusa máŋgga dásis. Áppas ráhkaduvvo virtuealla sámegielat arena gos gielat praktiserejuvvojit guovttebealat ovttasbarggu bokte. Áppa gávdno dál Norggas čuovvovaš guđa sámi variánttas: lullisámegiella-dárogiella, davvisámegiella-dárogiella, julevsámegiella-dárogiella, nuortalašgiella-dárogiella, bihtánsámegiella-dárogiella ja davvisámegiella-lullisámegiella. 

Dán čállá Sámediggi preassadieđáhusas. 

Spealu bokte oahppat

Nannen dihte oktavuođa ja ipmárdusa sámi guovlluin lea ovddiduvvon sávaldat ahte galggašii maid ráhkaduvvot lullisámegiella-davvisámegiella veršuvdna. Dat dagašii vejolažžan daid sámegielaid hubmiide oahppat giela njuolga nubbi nuppis, nu ahte ii dárbbaš dárogiela bokte oahppat. Áppa ulbmiljoavku leat buot badjel 13-jahkásaččat geat háliidit oahppat julevsámegiela-davvisámegiela nubbi nuppis.

Sámediggeráđđi lea dál addán doarjaga New Amigos julevsámegiella-davvisámegiella áppii.

– Mánáin ja nuorain lea dárbu geavahit sámi gielaid astoáiggis. New Amigos App lea digitála deaivvadanbáiki mii lea dehálaš sosiála, kultuvrralaš ja sámegielat aktivitehta movttiidahttimii, dadjá sámediggeráđđi Mikkel Eskil Mikkelsen (NSR). 

Ođđajagis gárvvis

Danne go New Amigos iešalddis lea somás speallu, de áigot maid deattuhit olahit sin geat dál eai obage árvvoštala oahpahallat eará sámi giela. Áppa galgá olahit dáid joavkkuid, nannet sin motivašuvnna hupmat sámegiela, ja nannet sámi identitehtadovddu.

Áppa galgá gárvánit 2024 ođđajagemánus, ja leat olámuttos App Stores ja Google Playas.

300 000 ruvdnosaš doarjja addo doarjjaortnega Doarjja giellaovddidandoaimmaide bokte.

-Almmuhus-