Doris Norbye Kárášjogas oaččui Finnmárkku valáštallanbiire gudnemearkka 2018, go áŋgirit lea ovddidan vuodjama.
Finnmárkku valáštallanbiire hálddahusjođiheaddji Marit Arntzen lohká Norbye ánssášit duođai bálkkašumi go lea 1964 rájes juo leamaš vuoddjin ja dasto hárjeheaddjin ja duopmárin, álggos Tromssas, muhtin jagiid Oslos ja 1986 rájes Kárášjogas, gos son dál ain lea vuodjanhárjeheaddji ja duopmár.
Buot dásiin vuodjamis
Sus lea hárjeheaddjioahppu buot dásiin vuodjamis. 1975:s gearggai NIH oahpuin mas vuodjan lei su váldofága.
Son lea oahpaheaddji sihke hárjeheddjiide, vuodjankurssain ja doallan kurssaid sihke mánáide, rávesolbmuide ja doaimmashehttejuvvon olbmuide.
Son lea duopmárin leamaš biirevuodjamiin, lihttovuodjan ja bajitduopmárin, ja lea stivrrain leamaš earret eará Kárášjoga vuodjansearvvis ja Finnmárkku vuodjanbiirres.
Ieš gilvvohallan
Son lea maid ieš šaddan máŋgii Davvi- Norgga measttirin vuodjamis, ja lea searvan maiddái EM gilvvuin Göteborgas ja Máilmmemeasttirgilvvuide Ricciones Italias.
Vuoitu lea 10.000 ruvnno árvosaš mátkekoarta, ja vuoittu geigejedje almmolaččat mannan vahkkoloahpa.
