Donald Trump USA presideantan: – Lea ágga vuorjašuvvat

Odne iđit čielggai ahte Donald Trump lea USA ođđa presideanta, son vuittii Hillary Clinton vuostá.

Republihkalaš Trump doaibmagoahtá presideantan ođđajagemánu rájes, go demokráhta Barrack Obama loahpaha iežas gávcci jagi presideantaáigodaga.

Cielahan indiánaid bahádahkkin

Aftenpostena journalista ja USA dovdi Jan Gunnar Furuly lohká ahte dál lea ágga vuorjašuvvat USA álgoálbmogiid dilis go Trump lea válljejuvvon presideantan.

– Son lea ovdal láitán álgoálbmogiid, ja son lea cielahan indiánaid korruptan ja bahádahkkin. Trump eaiggáduššá kasinoid, ja lea riidalan indiánareserváhta kasinoiguin. Trump lea maid lohkan ahte USA ii galgga šat eará riikkain viežžat gása, energiija ja koala. Dat iešalddis ii leat buorre álgoálbmogiidda. Lea váttis dadjat movt boahtteáiggis boahtá leahkit, go ii USA álgoálbmogiin leat buorre dál ge, ii ge Obama rievdadan dan nu olu. Dan oaidnit dušše Standing Rock áššis, lohká son.

Furuly ii jáhke ahte Clinton ge livččii nu olu buoret presideanta USA álgoálbmogiidda, muhto ahte livččii juobe buoret go Trump.

– De lea dat jearaldat ahte livččii go dilli buoret jus Hillary Clinton livččii vuoitán. In jáhke son ge livččii čoavdán makkár ge áššiid, muhto Trump lei dat heajut molsaeaktu álgoálbmogiidda, lohká Furuly.

Máilbmi manná heajut guvlui

Sámiráđi lahttu Olav Mathis Eira lohká ahte lea šohkka olles máilbmái go Trump lea šaddan USA presideantan.

Son čujuha Trump válgagižžui, ja lohká su fasttit láhtten:

– Dat muitala ahte máilbmi manná heajut guvlui. USA presideanttas lea nu olu fápmu, lea issoras go Trump lea beassan dasa, lohká son.

Eira čilge ahte su mielas máilbmi lea dál manname eahpedemokráhtalaš diktatuvrra guvlui, gos gievrras dievdoolbmot mearridit.

Son buohtastahttá Ruoššain, ja lohká ahte doppe lea sullii seammalágan dilli. Ruošša lei háliidan Trump presideantan, lohká son.

(Ášši joatká gova vuolábealde)

– Clinton áidna USA ministariin guhte lea searvan Árktalaš Ráđi čoahkkimiidda

Eira lohká ahte Clinton livččii buoret presideanta álgoálbmogiidda.

Eira lea oahpis Clintonii, ja lohká ahte Clinton dovdá álgoálbmogiid, ja maid sápmelaččaid.

Son muitala ahte Clinton lea áidna USA olgoriikaministtar guhte lea boahtán Árktalaš Ráđi ministtarčoahkkimii.

– Álgoálbmogiid dilli gal ii buorrán dál, dat lea nu čielggas go Ámen girkus! Dat mii lea váttis, lea go eat dieđe maid Trump oaivvilda. Jus dollet deaivása visot maid son lea lohkan, de ferte su gohčodit rasistan. Jus fal lea duohta nu go Clinton logai, ahte Trump ráđđeaddit leat gieldán Trumpa čállimis Twitterii, de fertejit sii váldit eret Trumpa atomabombakoaffara čoavdaga. Dat muitala ahte olmmái lea heaggavárálaš, lohká Eira.

Beare árrat einnostit

Eai buohkat leat nu vuorjašuvvan dainna go Trump ođđajagimánu rájes ráđđegoahte ovtta máilmmi superfámuin. 

– Lea vuos beare árrat lohkat movt ođđa presideanta váikkuha USA álgoálbmogiidda, lohká álgoálbmogiid gelbbolašvuođaguovddáža Gáldu direktevra Laila Susanne Vars.

Vars lea čuvvon mielde USA válggain, ja lohká ahte go Trump ii leat maide cealkán álgoálbmotáššiin, de lea váttis diehtit movt dat váikkuha.

Son goit ge oaidná ahte go ođđa presideanta áŋgiruššá eambbo bargosajiide ja eambbo infrastruktuvrii, de sáhttá dat čuohcat álgoálbmogiidda.

– Sáhttá hástalus go Trump háliida energiija, go mii diehtit go infrastruktuvrras lea sáhka, de váikkuha dat álgoálbmogiidda buot eanemus. Dál, go Dakota oljorevre lea hui áigeguovdil, de leat demokráhtat lohkan ahte dien berre bissehit. Dál boahtá ođđa bellodat stivrejupmái mii ii leat lohkan maide dien áššis.

(Ášši joatká gova vuolábealde)

Sávvan jo lihkku

Norgga stádaministtar Erna Solberg lea jo sávvan lihku Trumpii.

Son ii háliidan vástidit media gažaldagaide makkár áššiid dáfus vuorjašuvvá dahje vuorjašuvvá go obage dál go Trump lea válljejuvvon USA presideantan.