-Almmuhus-
KULTUVRADolvot sámi musihka ja luođi máilbmái

Dolvot sámi musihka ja luođi máilbmái

-

-

Sámi komponisttat ja Juoigiid Searvái leat álggahan prošeavtta man sávvet čalmmustahttit sámi musihka ja luođi internašunála márkanis.

Sami Music Expo lea Sámi Komponisttaid ja Juoigiid Searvvi prošeakta, ulbmil lea čalmmustahttit sámi artisttaid internašunála márkanis.

 

Sierra beavdi internašunála deaivvadeamis

Dán vahkku lea sáttagoddi mátkkoštan Santiago de compostelai, Spaniai, oassálastit Womexas, mii leat okta njunuš deaivvadanbáikkiin árbevirolaš- ja máilmmemusihkka birrasis máilmmis.

– Muhtimat mis oassálaste Womexas diibmá ja vásihedje ahte lei stuorra beroštupmi ja olusat geat jearahedje sámi musihka. Dát inspirerii álggahit prošeavtta mas 17 sámi artistta, juoigi ja managmenta servet sierra sámi oassái, man sávvet oažžut fuomášumi, lohká Sámi Komponisttaid jođiheaddji Elin Kåven.

 

Sámi Komponisttaid Anders Somby almmuhii dán videos, gos oidnojit sámi musihkkarat ovdanbuktimin iežaset musihka:

 

Dárbu nannet gealbbu ja fierpmádahkii

Womex lea bránšadeaivvadeapmi artisttaide, booking ageantaide ja managemeantaide máilmmemusihka suorggis, ja lea erenoamáš buorre márkanastin arena sámi artisttaide, gos maiddái besset oahpásmuvvat internašunála booking máilbmái ja hahkat fierpmádaga man bokte besset viidábut promoteret.

– Mii vásihat ahte sámi musihka váldomárkka vuosttažettiin lea internašunála dásis. Danne lea dehálaš ahte leat oidnosis internašunála arenain gos musihkkabargit deaivvadit ja ahte mii hahkat dan gealbbu man dárbbašat vai olahat internašunála márkanii. Sámi musihkas ja juigiin eai leat dakkárat duogábealde geat sáhttet veahkehit internašunála dásis promoteret ja danne lea min mielas dát prošeakta dehálaš. Mii sávvat prošeavtta áhtanuššat boahtteáiggis ja ahte das leat positiiva váikkuhusat sámi musihkkii ja luohtái, lohká Kåven.

 

 

Sámi Dáiddárfoanda ja Sámediggi leat dorjon prošeavtta. 

Das oassálastet Johan Sara jr., Elle Márjá Eira, Elin Kåven, Mari Boine v/Cristina Ruiz-Kellersmann, Anna M. Länsman, Magnus Vuolab, Berit Kirsten Sara, Per Tor Turi, Ellen A. Oskal-Spein ja Karen Anna Buljo.

Dasa lassin oassálastet Sámi Komponisttat Arve Nordland ja Anders Somby bokte, Juoigiid Searvvis ges Kirste Marit Olsen ja Thomas Marainen, Audioland ges Klemet Anders Buljo ja Olga Solyanik bokta ja Hætta Production ges Christina Hætta bokte.

 

-Almmuhus-