NRK-journalista Eilif Aslaksen álgá Dagbladet Finnmarken AS váldodoaimmaheaddjin.
NRK-journalista Eilif Aslaksen álgá Dagbladet Finnmarken AS váldodoaimmaheaddjin.
Odne almmuhuvvui ahte journalista Eilif Aslaksen šaddá Finnmarken aviissa ođđa váldodoaimmaheaddjin. Sámi journalista Eilif Aslaksen, gii dál bargá ain NRK Sámis, lohká ođđa virggi leat stuora hástalussan.
– Lea erenoamáš hástalus go diehtá aviissaid dili. Lohkkiid lohku lea gahččan hirbmosit ja lea stuora hástalus dien jorgalahttit. Muhto dat goit lea mihttu, ja lea ge várra dat mii mu geasuhii eanemusat, geahččalit juoidá mii orru veadjemeahttun nuppástuhttit. Nuppe dáfus mannet lohkkit eanet ja eanet neahta guvlui, ja dan gal ferte beare čuovvut. Dan ii sáhte bissehit vaikko áigu nannet báberaviissa, dadjá son Ávvirii.
Sisdoalu stivret
Aslaksen oažžu dál ovddasvástádusa vuosttažettiin Finnmarken báberaviissa sisdollui, muhto lunddolaččat maiddái neahttaaviisii ifinnmark.no, mii sis lea ovttas Finnmark Dagblad aviissain. Lea seammadássásaš váldi dan stivret, vaikko neahttaavissa formálalaččat hálddaša neahttaredaktevra Arne Reginiussen Finnmark Dagblad aviissas, geas maid šaddá beaivválaš jođiheapmi ja direktora hommá.
– Šaddá maid hui guovddáš bargu ovdánahttit ain neahttaaviissa ovttas, ja dat gal lea odne juo nana buorre neahttabáiki, dadjá Aslaksen.
Guorahalli journalista
52-jahkásaš Eilif Aslaksenis lea guhkes journalistakarriera. Maŋemus logi jagi lea bargan guorahalli journalistan NRK Sámis, mas muitit ovdamearkka dihte boazologu áššiid, ovddeš sámediggeáirasa Johan Mikkel Sara- áššiid ja vuoigatvuođaáššiid maid rokkaiga Thor Thranein.
Son lea maiddái bargan TV 2:s, Finnmark Dagblad:s ja iežas fitnodagas journalistan. Finnmarken aviissas lea bargan guovtti áigodagas 80- ja 90-loguin, ja gohčoda ge dan boares ráhkisvuohtan.
– Dalle lei Finnmarken okta dain buoremus aviissain olles Davvi-Norggas. Lei hui somá bargat Finnmarken aviissas ja mun ohppen hui olu dain bargiin mat dalle ledje. Lea agibeaivái bisánan váibmui ja jurdagiidda, ja nu lea dego boares ráhkisvuohta, čilgesta ieš.
Ii dáidde sámáiduvvat
Go son čavčča mielde álgá ođđa ámmáhii, lohká son Nuorta-Finnmárkku ođasáššiid vuoruhit, ja olbmot doppe galget dovdat aviisa lea relevánta sidjiide. Ja vaikko son lea ieš sápmelaš, ii dárbbaš dat mearkkašit ahte aviissas šaddá stuorit fuomášupmi sámi guoskevaš áššiide.
– Lea hui lunddolaš ahte sámi guoskevaš áššit leat Finnmarken aviissas, nugo eará mediain ge dáppe. Soaitá ahte eai leamaš dat áššit nu oidnosis mat sámi servvodagas leat guovddážis, muhto in daja ahte dat šaddet eanet. Dat lea vuoruheapmi, man láhkái leat dat relevánta Finnmarken geavaheddjiide ja lohkkiide, man mielde ferte dien árvvoštallat, dadjá Eilif Aslaksen.
