Dán vahkku leat Dollarbeaivvit Kárášjogas. Kárášjoga fitnodagat rámpojit ealáhussearvvi, go doaimmat loktejit ealáhusaid Kárášjogas.
Dán vahkku leat Dollarbeaivvit Kárášjogas. Kárášjoga fitnodagat rámpojit ealáhussearvvi, go doaimmat loktejit ealáhusaid Kárášjogas.
Dán vahkku leat Dollarbeaivvit ja geassemárkanat Kárášjogas man Kárášjoga ealáhussearvi lágida.
Juohke 200 ruvnno ovddas maid gávppaša Dollar-rambuvrrain dán vahkku, oažžu ovtta loatta lávvordaga vuorbádeapmái, mas váldovuoitu lea 30 000 ruvnno.
Kárášjoga ealáhussearvvi jođiheaddji čilge ahte dat vahkku lea vuohki movt oažžut olbmuid gávppašit báikkálaš rámbuvrrain. Dál lea goalmmát háve go Dollarbeaivvit lágiduvvojit Kárášjogas.
– Vuosttažettiin galgat geasuhit olbmuid eambbo gávppašit báikkálaččat. Lea čájehuvvon ahte gálvojohtu stuorru hirbmosit, ja go lea olu kontántamáksin, de buorrána fitnodagaid likviditehta maid, muitala Kárášjoga ealáhussearvvi jođiheaddji Nils Johan J. Gaup.
Ovddida ealáhusaid
Niiberávderámbuvrra Knivsmed Strømeng bargi Airin Utsi lohká ahte Dollarbeaivvit leat buorrin olles Kárášjoga ealáhuseallimii.
– Lea hirbmat buorre go dákkár beaivvit leat, mii ovddida gili fitnodagaid ja maid ovttasbarggu fitnodagaid gaskkas. Kárášjohka lea unna giláš, ja lea dehálaš ahte fitnodagat ovttasbarget vai ealáhusat ovdánit, lohká Utsi.
Son lohká maid fitnodagaide lea buorrin go Dollarbeaivvit márkanfievrriduvvojit.
Olu kundarat fitnet
Airin Utsi lohká ahte dán vahkku fitnet erenoamáš olu báikki olbmot gávppis.
– Dollarbeaivvit dovdojit bures, báikki olbmot fitnet gávppašeame. In dieđe leat go vuordán dán vahkkui dassá go fitnet, muhto sii fitnet dán vahkku ja ostet dan maid ledje háliidan, go soitet vel vuoitit seammás, muitala Airin Utsi.
Unna báikkážis dáhpáhus
Kjell Rune Balto jođiha Kjells kafé boradanbáikki, ja lohká ahte márkanbeaivvi easka láve vuohttit Dollarbeivviid, go dalle lávejit olu olbmot.
– Mu mielas lea hui buorre go dákkár lágideapmi lea, Kárášjohka lea unna báikkáš, lea buorre go dáhpáhuvvá juoga. Vuorraset olbmot maid nu liikojit go juoga dáhpáhuvvá. Eará báikkiin maid bohtet olbmot, lohká Kjell Rune.
– Buorre kundariidda
4you bivttasrámbuvrra beaivválaš jođiheaddji Ann Gørill Eideng Berg ii leat vuos vuohttán gávppašeddjiid lassáneami, nu go ovddit háviid lea dahkan go Dollarbeaivvit leat leamaš.
– Lea hui buorre áŋgiruššan ealáhussearvvi bealis, somá go juoga geavvá márkanis, ja jáhkán geasuhit olbmuid eará báikkiin maid, lohká Eideng Berg.
Su mielas lea buorre erenoamážit kundariid dáfus, go kundarat ožžot vejolašvuođa vuoitit stuora ruhtasupmi.
Sámediggepolitihkkárat gilvalit
Lávvordaga loahpahuvvojit Dollarbeaivvit, ja márkanbáikkis šaddá ealas. Beaivvi miehtá lea guoimmuheapmi, musihkkarat ja juoigit galget guoimmuhit. Dollarvuoiti maid vuorbáduvvo márkaniin.
Ealáhussearvi lea maid hástalan Ávjovári Sámedikki politihkkariid searvat gilvvuide, muhto Nils Johan J. Gaup ii muital vel juste makkár gilvvut galget leat.
– Eat muital vuos visot, muhto duosttan almmuhit ahte politihkkarat besset njorostallat veahá, lohká son.
Márkaniin galget maid buvddažat gos gaskal 20 ja 30 fitnodaga vuvdet iežaset gálvvuid. Gaup vuordá olu olbmuid márkaniidda, erenoamážit dál go Caravan-deaivvadeapmi lea seamma vahkkoloahpa.
