Dán geasi Kárášjoga geassemárkaniin sáhtát vuoitit «dollárkoffara» mas lea 40 000 ruvnno.
Dán geasi Kárášjoga geassemárkaniin sáhtát vuoitit «dollárkoffara» mas lea 40 000 ruvnno.
Kárášjoga ealáhussearvi lágida lávvordaga geassemánu 18. beaivvi geassemárkaniid guovdu Kárášjoga márkana, muhto dán jagi leat vuoruhan juoga man leat gohčodan «DollárBeaivvit» mat álget juo geassemánu 15. beaivvi ja bistet gitta lávvordahkii go iešalddis dat geassemárkanat leat guovdu márkana.
– Mis lea koffar masa olu fitnodagat leat bidjan ruđa. Doppe lea 40 000 ruvnno maid soames gávppašeaddji vuoitá. Vuorbádeamis leat mielde buohkat geat gávppašit geassemánu 15. beaivvi rájes gitta 18. beaivái fitnodagain mat leat searvan mielde «DollárBeivviide»
Dán muitala Kárášjoga ealáhussearvvi jođiheaddji Nils Johan Gaup.
DollárBeivviid loattat
«DollárBeaivvit» doibmet ge dainna lágiin, ahte juohke 200 ruvnno ovddas maid gávppaša gaskavahkku rájes lávvordaga rádjái fitnodagain, mat leat searvan «DollárBeivviide», luvve ovtta loatta. Ovdamearkka dihte jus gávppašat duhát ruvnno ovddas, de leat dus njeallje loatta mielde vuorbádeamis.
Kulturdoalut
Dán jagi leat ge measta buot Kárášjoga ealáhussearvvi miellahttofitnodagat searvan geassemárkaniidda guovdu márkana vuovdalit iežaset gálvvuid ja buktagiid. Gávpesuonjirat lea ge miehtá márkanguovddáža.
Ii das galli ahte šaddet márkanat ja stuorra ruhtavuoitu dáid beivviid, de leat fitnodagat maiddái vuoruhan lágidit kulturdoaluid, earret eará musihkka – ja luohteguoimmuheami, muhto olu eará maid.
– Mii árvvoštallat goit 1000-2000 olbmo galledit Kárášjoga dáid beivviid, nu ahte jáhkkit šaddat stuorámus geassemárkanin mii goasse ge lea leamaš Kárášjogas, dadjá Gaup. Šaddet viehka erenoamáš geassemárkanat maidda duođaid illudat, dadjá Kárášjoga ealáhussearvvi jođiheaddji Nils Johan Gaup.
Sii maiddái ráhkkanit sáddet njuolggosáddaga neahtas, sihke gaskavahkku ja lávvordaga.
– Gaskavahkku suoidnemánu 16. beaivvi lea ge almmolaš rahpan DollárBeivviid máttabealde Kárášjoga šalddi ja das leat mielde
Visot fitnodagat markeremis, ja dat sáddejuvvo njuolggosáddagis neahta bokte, dadjá Nils Johan Gaup loahpas.
