-Almmuhus-
-Almmuhus-
OĐĐASAT– Dohkketmeahttun!

– Dohkketmeahttun!

-

-

Finnmárkku fylkkasátnejođiheaddji, Runar Sjåstad, mielas ii leat heivvolaš ahte Sámi Álbmotbellodat máksá ja áŋgiruššá russaid čoaggit bellodahkii vuolláičállagiid.

Sámi Álbmotbellodat (SáB) dárbbaša 500 vuolláičállaga ovdal njukčamánu 31. beaivvi. Jus dán eai olat, de eai beasa cegget listtu fylkkadikkeválggaide. Vai johtilit čoggojit vuolláičállagat, de lea SáB bálkkáhan Guovdageainnu ja Kárášjoga russaid, sii ožžot 75 ruvnnu juohke vuolláičállaga ovddas.

 

Moralalaččat boastut

Finnmárkku Fylkkasátnejođiheaddji Runar Sjåstad (BB) ii doarjjo SáB vuogi čohkket vuolláičállagii beassandihti bellodatregisterii. SáB ferte čohkket 500 vuolláičállaga vai dohkkehuvvo bellodahkan ja beasašii searvat čavčča fylkkadikkeválggaide.

 – Mu mielas lea dohkketmeahttun, moralaččat boastut. Lea njulgestaga veahá váivi, mu mielas lei Sámi Álbmotbellodat baicce galgat geavahit ruđaid ja fámuid márkanfievrridit politihkaset. Jáhkkán dat vuohki livččii háhkat sidjiide doarvái vuolláičállagiid. Mu mielas lea politihkalaš máŋggabealálašvuohta dehálaš fylkkadikkis, muhto dalle galgá politihkka guovddážis, ii fal ostojuvvon doarjja, dadjá Sjåstad iFinnmark.no neahttaaviisii.

 

Lobálaš

iFinnmark lea guorahallan SáB bargovuogi lobálašvuođa. Gieldda- ja ođasmahttindepartemeantta juridihkalaš ossodagas vástidit ahte lea gildojuvvon oastit jienaid, dáinna sáhttá ráŋggáštuvvot. Muhto go čoaggá vuolláičállagiid ceggendihti listtu, de lea áidna gáibádus ahte namat leat čállojuvvon peannain, elektrovnnalaš vuolláičállagat bálkestuvvojit.

 – Prinsihpalaččat ii leat Sámi Álbmotbellodat bargovuohki, áŋgiruššat russaid, lobiheapme, čilge ráđđeaddi Steinar Dalbakk.

 

Beaškala ruovttoluotta

SáB njunuš, John Nystad, beaškala ruovttoluotta go gullá fylkkasátnejođiheaddji cealkámuša.

 – Son ii galgga hállat morála birra. Son diehtá ahte sin nuoraidbellodat AUF čáliha vuolleahkásaččaid bellodahkii lohpádusain nuvttá skuvlaborramušain, nuvttá skuvlasáhtuin ja ahte skuvla ii galgga nu árrat iđida álgit. Dat lea baicce dohkketmeahttun. Sjåstad geahččala jávohuhttin min vaikke ii dovdda ášši duogáža, dadjá son. SáB lea áŋgiruššan russaid čoaggit 500 vuolláičállaga bellodahkii, govas oaidnit njunnoša John Nystad ovttas guovtti kárášjohkalaš russain. Vuorkágovva: Berit Marie Lise Eira.

-Almmuhus-