Ávvira Guovdageainnu, Kárášjoga ja Álttá ossodagat lea dál sertifiserejuvvon nu gohčoduvvon Birasčuovgadoardnan. Dat sertifikáhtta lea Norggas eanemusat geavahuvvon duođaštussan ásahusaide mat háliidit duođaštit birasbarggu ja čájehit servodatovddasvástádusa.
– Lea leamašan olu bargu vuos systemáhtalaččat kártet min doaimma dan geahčestagas. Jus galgá oažžut dán sertifiserema, de dat eaktuda ahte doaibma lea birasustitlaš buot dásiin, čilge Ávvira doaimmaheaddji Kari Lisbeth Hermansen.
Vaikko lea leamašan olu bargu, de deattuha Ávvira doaimmaheaddji ahte lea leamašan dan veara:
– Bargagoahtit dainna lea leamašan dego čievččastat midjiide dihtomielalaččabut leat birasgáhttemiin ja árvvoštallat maid mii sáhttit dahkat vai doaimmahit fitnodaga birasustitlaččabut.
– Dehálaš váikkuhit
Ávvira beaivválaš jođiheaddji Tor Sara čilge mas vulggii jurdda oažžut fitnodaga sertifiserejuvvon Birasčuovgadoardnan:
– Vuolggasajis lei mu oainnus prinsihpalaš mearrádus. Mii oaivvildeimmet ahte lea dehálaš váikkuhit dan maid mii sáhttit, ja ahte mii, jođiheaddjit, váldit ovddasvástádusa ruoná molsumis mas mii leat. Go guoská ovdamuniide leat mielde, de lea čielggas ahte proseassas leat ekonomalaš ovdamunit go geahčadišgoahtit ja analyseregoahtit min iežamet energiijageavaheami ja doappargieđahallama. Ledje olu diŋggat das ahte go lea dihtomielalaš, de lea vejolaš seastit ruđa, dadjá Tor Sara.
Ožžon cavgilemiid ja bagadallama
Son muitala ahte stuorámus guoddočuozahus bargiin lea ahte šaddet diđolažžan das maid berrejit ja eai berre bargat. Visot das makkár reaidduid oastit, geas oastá, leat go birassertifiserejuvvon gálvvut ja lágideaddjit.
– Gaskaboddosaččat de leat aiddo sertifiserejuvvon nu ahte leat kárten maid bargat, ja dan maid barggaimet mat eai doallan lági leat divvon ovttatmano. Eat mii lean issoras heajut ovdal go álggiimet, muhto leat ožžon cavgilemiid ja bagadallama maid berret bargat, dadjá Sara.
– Lean hui rámis
Guovdageainnu sátnejođiheaddji Hans Isak Olsen geigii mannan vahkku duođaštusa Ávvira Guovdageainnu ossodahkii:
– Vuosttažettiin gal ferten lohkat mun lean hui rámis go iežamet fitnodagat olahit dakkáriid ja vuosttažettiin obage bidjet johtui dakkár barggu ahte galggašii olahit dan. Mu mielas lea máilmmi buorre, ja čájehit beroštumi servodatovddasvástideaddji fitnodahkan ja maiddái beroštumi dahkat juoidá luonddu ovddas, muitala sátnejođiheaddji.
Golbma ásahusa leat sertifiserejuvvon
Dál leat Guovdageainnus golbma ásahusa mat leat sertifiserejuvvon, ovttas Ávviriin de leat Vinmonopolet ja Thon Hotel maid sertifiserejuvvon.
– Livčče dieđusge ulbmil ahte eambbosat servet ja dát gal sihkkarit galggašii movttiidahttit ja maiddái čájehit earáide ahte go Ávvir mediaásahus sáhttá leat mielde, de leat olu fitnodagat mat sáhttet leat mielde. Mađi eanebut, dađi buoret, dadjá Olsen.
Su mielas lea buorre go fitnodagat gillejit searvat ja lea áigumuš olahit mihtuid, ja ávžžuha eará fitnodagaid bargat dan seamma.
– Dat duođaštus maid dál leat ožžon ii leat agibeaivái. Dát geatnegahttá min jus galgat doalahit sertifiserema doaimmahit iežamet doaimmaid birasustitlaččat. Dan jáhkán mannat bures, go sihke jođihangottis ja bargiid gaskkas lea stuora dáhttu váldit min oasi birasgáhtten ovddasvástádusas ja leat ovdagovvan eará fitnodagaide, lohká Kari Lisbeth Hermansen vel.
