Ruoŧa Sámedikki válgalávdegoddi lea dohkkehan 875 ođđa ohcama ja hilgon 148 ohcama Sámedikki jienastuslohkui, muhto juohkehaččas lea ain vejolaš daid váidit.
Ruoŧa Sámedikki válgalávdegoddi lea skábmamánu 12. beaivvi dohkkehan preliminára jienastuslogu mii dál lea biddjon dárkkisteapmái 32 báikái Ruoŧas, čállá Ruoŧa Sámedikki preassadieđus.
1 023 ohcamis lea Sámedikki válgalávdegoddi dohkkehan 875 ođđa nama ja hilgon 148 nama. Dat mearkkaša ahte 875 sápmelačča ožžot vuohččan jienastit sámediggeválggain boahtte jagi. Sámi jienastuslohku lea lassánan 435 olbmuin ja dál leat 9 201 registrerejuvvon jienasteaddji. Lohku sáhttá rievdat maŋŋelgo válgalávdegoddi lea dohkkehan loahpalaš jienastuslogu njukčamánu 1. beaivvi 2021.
Preliminára jienastuslogu lea vejolaš váidit. Son guhte lea dasa dieđihan ii ge leat váldon mielde, sáhttá váidit mearrádusa. Juohkehaš guhte váldo mielde preliminára jienastuslohkui sáhttá váidit jus muhtun iežá olmmoš lea dohkkehuvvon. Váidda galgá ollen Norrbottena leana leanastivrii ovdal juovlamánu 15. beaivvi 2020.
Lea leanastivra mii mearrida váidagiid.
