Ráđđehus mearridii skábmamánu vuosttaš beaivvi botket doavtterstreaikka bákkolaš bálkálávdegottiin. Doaktárat máhccet bargui vajot.
– Leat ilus go dát lea meattá ja mii vuhtii váldit ahte ráđđehus árvvoštalai dili nu duođalažžan ahte botkii streaikka mii lea garrasit čuohcan daidda gielddaide. Daid gielddaid gielddahálddahusat leat ballan dat váikkuha ássiid dearvvašvuhtii ja lea heaggavárálaš, lohká KS fágalihtu bargoeallima direktevra Tor Arne Gangsø, preassadieđáhusas.
Skábmamánu nuppi beaivvi lei almmuhuvvon ahte streaika lasihuvvo velá čieža gielddas. Daid gielddain leat uhcán ássit ja guhkes gaskkat ja juohke áidna doavttir lea dehálaš jus doavtterfávttavuorru galgá doaibmat.
Buot gielddat ohce Doavttersearvvis sierra lobi streaikkas, go sis ii livčče lean oktage doavttir doavtterfávttas nuppi beaivvi rájes. Eatnašat eai ožžon sierra lobi. Danin dieđihedje dat čieža gieldda ahte sii ballet dan čuohcat ássiid dearvvašvuhtii ja heggii.
Heakkaváralaš dilli ássiide
– Dábálaččat sáhttet oažžut sadjásašdoaktára sadjái dahje ovttasbargat kránnjágielddain. Muhto dat rehkenaste ahte lea streaikabotken ja gielddain ii leat vejolašvuohta suddjet buhcciid dárbbu, čilge Gangsø.
KS fágalihtu bargoeallima direktevra Tor Arne Gangsø lohká sii áddejit doavttersearvvi, muhto jus buot ássit buot gielddain galget iežaset dovdat oadjebassan, de ferte fáhkkamedisiinnalaš láhkki leat ortnegis, doavtterkantuvrras, doavtterfávttas, ambulánsabálvalusas, 113-guovddážis ja buohcciviesu fáhkkavuostáiváldimis.
– Mii fertet iskat ođđa vugiid, earret eará lea go vejolaš geavahit telemedisiinna ja eará digitála reaidduid eambbo nu ahte eat dárbbaš geavahit doavttergelbbolašvuođa, lohká KS bargoeallima direktevra Tor Arne Gangsø.
