Doarreda NM-niegu 

​Sámi bárdni Markus Hellander Gjesdalas (21), guhte lea Arendalas eret, háliidivččii beassat boahtte NM -oassái Formel K valáštallamis, mii lea Go Kart valáštallan.

Gilvvut lágiduvvojit geassemánu 30. beaiv­vi NAF Go Kart šiljus Vestfolddas.

Dárbbaša doarjaga

Ii dákkár gilvui leat nu álki beassat, ja almmái muitala iežas dárbbašit ruđalaš veahki.

– Ii leat mihkkege čiegusvuođaid ahte mohtorvaláštallan lea divrras, vel daid vuolemus dásiin ge. Lea resursagáibideaddji valáštallan, nu go čuoigan ja sihk­kelastin, ja jus galggaš olahit bajimussii, de dárbbaša rusttegiid mat cevzet gitta mollii. Lea hárve go beassá geavahit seamma osiid máŋga áigodaga, go eanas biilaoasit leat dakkár diŋggat mat gollet, muitala Hellander Gjesdal preassadieđáhusas.

Buriid bohtosiid olahan

Markus muitala ahte son vuodjigođii 2015:s, ja son lea dušše ovtta olles áigodaga vuodján, ii ge nu máŋga gilvui ge searvan.

Liikká lea son jo olahan buriid bohtosiid, suinna fárrolaga vudjet muhtimat Norgga ja máilmmi buoremus vuddjiin.

– Mus lea máilmmi stuorra hástalus vuordimis. Sihke hárjehallan dán dálvvi ja dat ahte gávdnat sponsoriid, jus galggažan nagodit olahit maidege NM:s. Dábálaš cupa-áigodagas leat gávcci vuodjima, NM:s lea dušše okta vuodjin gos fertet dalle lihkostuvvat, čilge son.

Lassin NM:i sávvá son beassat maid vuodjit muhtin vuodjimiid mat addet čuoggáid RMC (Rotax Max Challenge) gilvvuin, muhto váldofokus dán jagi lea NM oassálastin ja doppe olahit buori bohtosa.

– RMC oassálastin lea gitta das ahte nákcen go gávdnat liigebarggu mainna nagodan ruhtadit vuodjima, danne sávan ahte gávnnašin ruhtadeddjiid geat háliidit máksit stuorámus goluid, mat leat ođđa rusttegiid oastin, čilge son.

Šaddá guokte diimmu vuodjit hárjehallanbáikái

Juste dál ii gávdno hárjehallanbáiki dán valáštallamis Aust-Agderis, gos Markus ássá.

– Dávjá šattan vuodjit guokte diimmu hárjehallanbáikái, go Aust-Agdera hárjehallanbáiki ii leat šat FIA dohkkehuvvon, ja nu ii sáhte doppe hárjehallat, čilge son.

Bovde sponsoriid mielde

Go Markusis jerro maid sponsorat sáhttet vuordit oažžut sus ruovttoluotta ruhta­deami ovddas, de vástida ná:

– Sávan diehttelasat ahte beasašin addit ovtta dahje máŋgga fitnodahkii erenoamáš reklámasaji, dakkár birrasis gos leat iešguđet ahkásaččat. Dáppe leat sihke mánát, nuorat, váhnemat ja áhkut ja ádját iešguđet guovlluin Norggas. Sávan maid ahte beasašin bovdet sin mielde vuodjit, nu ahte besset veahá dovdat vuoiŋŋa dan valáštallamis maid sponsejit. Dat lea duođaid áibbas eará vásáhus go maid olmmoš govahallá.

130 km/d:s vuodjá

Markusa luohkás geavahit motovrra mas lea namma BRP Rotax Max DD2.

– Dáppe Norgga lea mus alimus leaktu leamašan birrasii 130 km/diimmus. Olgoriikkas gávdnojit vuodjenšiljut gos sáhttá vel eanet leavttuin vuodjit, čilge Markus.

Go nie leaktu lea, de ferte maid nagodit bisánit.

– Nu ahte mis leat goazanat njealji juvllas. Ii leat hárve ahte olaha measta 3g-fámuid muhtin mohkiin daid šiljuin gos mi vuodjit.

Su biillas lea Itália rámma, mas lea namma Birel Art, ja son muitala garra fámuid vásihit vuojedettiin.

 – Daid fámuid maid rumaš dovdá dákkár go karta vuojidettiin, sáhttá buohtastahttit daiguin maid Formel1 vuoddjit dovdet, čilge son vel loahpas.