Politijat leamaš guovtti sajis mannan ija gos leat doarrán olbmot.
Finnmárkku politijat dieđihit ahte mannan ija ožžon dieđu ahte okta almmái leat doaruhuvvon muhtun olgobáikkis Kárášjogas. Politijat fitne báikkis ja ožžo oktavuođa suinna gii lea doaruhuvvon ja dolvu su doavtterguovddážii iskosii.
– Guokte olbmo doarráiga muhtin olgobáikkis Kárášjogas, gos mii finaimet. Mii gažadeimmet sihke sivaheaddji, gillajeaddji ja maiddái vihtaniid geat ledje báikkis go dáhpáhus geavai. Čájehuhuvvo dassážii ahte gillájeaddji ii leat garrasit roasmmohuvvan. Lea álggahuvvon ášši maŋŋel dan dáhpáhusa, muhto ii leat oktage biddjon giddagasii dán áššis, lohká Politiija operašuvdnajođiheaddji Lars Rune Hagen.
Barttas huškkastan nuppi
Politijat ožžo maiddái mannan ija dieđu ahte okta almmái lea gillán veahkaválddálašvuođa muhtin barttas olggobealde Álttá. Politiijat fitne báikkis ja gažadedje gillájeaddji.
– Guokte olbmo leigga muhtin barttas olggobealde Álttá, gos muhtun lea huškkastan nuppi. Leigga dušše soai geat leigga barttas eaige leat makkárge mearkkat maid sáhttá oaidnit maŋŋel veahkáválddálašvuođa. Doppe eai lean vihtanat ja mii finaimet báikkis gažadit goappašagaid, dadjá Hagen.
Politiijat dutket ášši.
Lea go eanet veahkaválddálašvuohta leamaš beassážiid áigge?
Politiija operašuvdnajođiheaddji Lars Rune Hagen ii sáhte lohkat lea go Finnmárkkus lassánan veahkaválddalašvuohta beassážiid áigge.
– Mus ii leat makkárge statistihkka mii dan čájeha ja masa sáhtán čujuhit, nu ahte lea váttis dál dadjat ja mii fertet geahččat dan maŋŋel beassážiid, loahpaha Hagen.
