-Almmuhus-
-Almmuhus-
-Almmuhus-
OĐĐASATDoarju mátkeealáhusovddideami Unjárggas

Doarju mátkeealáhusovddideami Unjárggas

-

-

Sámediggeráđđi juolluda 400 000 ruvnnu Vesterelvjenta AS:i Unjárggas ovddidit ja ásahit idjadanfálaldaga turistavásáhusaid várás Várjavuonas. – Kultur- ja vásáhusvuđot turisma sáhttá váikkuhit ovdáneami sámi guovlluin, dadjá sámediggepresideanta Vibeke Larsen.

Fitnodaga eaiggát, Edgar Olsen, lea logi jagi doaimmahan mearrabivdoturismma mearrasámi gielddas Unjárggas.

Son háliida hukset guokte allastandárda bartta oktan sávnniin fállan dihtii idjadeami daidda gussiide geat áigot oaggut vuonas ja vásihit Várjavuona.
 – Dat ahte sáhttit fállat gussiide ollislaš buvttapáhka sihke vásáhusaiguin ja idjademiin, dat buorida gánnáheami, dadjá sámediggepresideanta Vibeke Larsen preassadieđáhusas.

 

Lihkostuvvat viiddidemiin

Larsen dadjá ahte Vesterelvjenta AS fitnodagas leat buorit vejolašvuođat lihkostuvvat viiddidemiin go sis leat guhkes áiggi vásáhusat mátkeealáhusdoaimmain ja márkan jearaha vásáhusvuđot turismma.
 – Sámediggi áigu máhcahit eretfárrema sámi guovlluin. Dat ahte oččodit máŋggabealat ealáhuseallima ja bargosajiid erenoamážit nuoraide, lea hui deaŧalaš dasa ahte lihkostuvvat dainna, dadjá Larsen. Go ovttastahttá kulturealáhusaid, hutkáivuođa, mátkeealáhusa, báikkálaš biepmu ja nana vuođđoealáhusa, de dat addá ovdánanvejolašvuođa. Dát ealáhusat sáhttet váikkuhit positiiva ealáhus- ja servodatovdáneami sámi guovlluin boahtteáiggis, dadjá Larsen.
 

-Almmuhus-