Sámediggeráđđi lea juolludan ruđaid Iđut lágádussii almmuhit julevsámegillii Giella 2 ja Giella 4, mat galget geavahuvvot 2- ja 4-jahkásaš mánáid giellakártemii.
Sámediggi lea juolludan gitta 93 000 ruvnnu rádjái almmuhit julevsámegillii Erna Horn & Astrid L. Dalin čállosa: «Språk 2 – Kartlegging av barnets språk ved 2-årskonsultasjonen på helsestasjonen», ja gitta 85 000 ruvnno almmuhit julevsámegillii Erna Horn & Astrid L. Dalin čállosa: «Språk 4 – Kartlegging av barnets språk ved 4-årskonsultasjonen på helsestasjonen», čállá Sámediggi preassadieđáhusastis.
Dárbu eambbo kártenávdnasiidda
Giellaiskkadeamit/kártenávdnasat galget veahkehit kártet máná giela go mánná boahtá dearvvašvuođastašuvdnii 2- ja 4-jagi iskkadeapmái. Prošektii gullet kártenskovit ja geavaheaddjibagadus.
– Sámediggi oaidná ahte dárbbašuvvojit kártenávdnasat julevsámegillii, dadjá Sámedikki várrepresideanta Lars Filip Paulsen.
Earret eará lea Divttasvuona suohkan jearahan giellaiskosiid julevsámegillii.
Seamma vuoigatvuohta ovddiduvvot
Sámediggi lea ovdal addán doarjaga jorgalit ja heivehit kártenávdnasiid davvisámegillii ja lullisámegillii.
– Juksan dihtii ovttadássásašvuođa ja dásseárvvu gielaid gaskkas ja vai Julevsámi mánáin galgá leat seamma vuoigatvuohta sin giellaoahppama ovddiduvvot, kártejuvvot ja iskojuvvot, oaidná Sámediggi dárbbašlažžan ahte kártenávdnasat leat maiddái julevsámegillii, dadjá Paulsen.
Iđut lágádus galgá sihkkarastit ahte giellaiskkus vuovdaluvvo ja juhkkojuvvo sámi geavaheddjiide.
