Sámediggi lea juolludan 200 000 ruvnnu doarjaga Návuona suohkanii Árres AS prošektii.
Ulbmil dainna prošeavttain lea ásahit diehtojuohkinguovddáža boazodoalu ja mearraservodaga váste ja mihttun lea ásahit verddeguovddáža.
Sámediggi čállá preassadieđáhusas ahte verddeguovddáš galgá gaskkustit boazodoalu ja mearraguovllu historjjá, vieruid, giela ja árbevieruid. Mihttojoavkun leat sihke dáluássit ja boazosápmelaččat, skuvlaoahppit sihke vuođđo- ja joatkkaskuvlla dásis, ja lassin maid almmolaš bargit ja ealáhusat.
Guovddážis lea maid mihttun olahit sihke riikadási ja gaskariikkalaš mihttojoavkkuid, nu mo turisttaid, dutkiid ja eará fágaolbmot.
Muotka duhtavaš
Sámediggepresideanta Silje Karine Muotka (NSR) lea hui duhtavaš go Sámediggi sáhttá doarjut dakkár ásaheami Návuonas.
– Lea dehálaš doarjut dakkár doaimmaid mat nannejit diehtojuohkimiin fálaldagaid ja čalmmustahttit dárbbu ja ávkki boazosápmelaččaid ja mearraguovllu ássiid verddestallamis, dadjá Muotka.
Son sávvá ahte prošeavttain nagodit bidjat buori vuođu guovddáža ásahemiin, ja ahte dat šattašii fálaldahkan turisttaide, gávnnadanbáikin, fágaguovddážiin ja diehtojuohkinguovddážiin historjjá birra. Dainna ođđa guovddážiin sáhttet maid buorebut čalmmustahttit čanastagaid luondduávkkástallamiid, ja mat leat oktasaš beroštumit, sihke mearraássiide ja boazosápmelaččaide.
Regionálaovdánahttin
Doarjja juolluduvvo regionálaovdánahttinprošeaktan ja lea oassin vuoruhemiin. Dan doarjjasuorggis de vuoruhuvvojit prošeavttat mat gusket sámegiela, kultuvrra, servodateallimii ja leat oassin ovttasbargošiehtadusain gaskkal Sámedikki ja fylkkasuohkaniid ja gávpotsuohkaniid
