Sámediggeráđđi juolluda 304 000 ruvnno guluhemiid riikkasearvái vai háhket sámegielagiid, ja ráhkadit diehtojuohkingihppagiid.
-Gullanváttisvuođat leat lassáneamen servodagas oppalaččat, muhto eatnašiin lea uhccán máhttu dan birra guđe váikkuhusat das lea dearvvašvuhtii. Mis ii leat sivva jáhkkit ahte dilli lea eará láhkai sámi servodagas, čállásámediggeráđđi Henrik Olsen preassadieđáhusas.
Son lohká diehtojuohkinávdnasiid leat dehálažžan jus galgá lasihit máhtu sámi servodagas.
Streassa
Olsen čujuhusa maid dasa go ollugat geain leat gullanváttisvuođat, rahčet sakka streassaváikkuhusaiguin. Servodagas gullanváddu stigmatiserejuvvo ii ge dat áddejuvvo.
– Dasa lassin dagaha gullanváddu ahte sosiála searvan šaddá lossat go ii leat nu álki searvat háleštemiide. Nuoraide dát vásihuvvo hui lossadin. Dalle lea buorre beassat háleštit nuppiin olbmuin geas leat seamma hástalusat, ja geas soitet leat vuogit mo buorebut hálddašit árgabeaivvi, čállá Olsen.
Iežas gillii hállat
Sámediggi háliida ge ahte sámi guluhemiin galgá leat vejolašvuohta hállat iežaset gullanhástalusaid birra iežaset eatnigillii, ja danne sii dorjot dan barggu ja juolludit 304 000 ruvnno Hørselshemmedes landsforbund:ii.
