Finnmárkku fylkkagielda mearridii 2019:s ásahit bušeahttapoastta kvena/dárusuoma ulbmiliid várás, ja ruhta lea dál ohcanláhkái,
Doarjjaortnega ulbmil lea nanosmahttit ja čalmmustahttit kvenagiela, kvena/dárusuoma kultuvrra ja servodateallima Finnmárkkus.
Finnmárkku fylkkagielda dáhtošii doarjjaortnega bokte ollašuhttit earret eará čuovvovaš mihtomeriid:
Nannet ja lasihit kvenagiela geavaheami, earenoamážit mánáin ja nuorain, lasihit oassálastima kvena/dárusuoma kultuvrii, earenoamážit mánáid ja nuoraid gaskkas, ja lasihit kvenagiela ja kvena/dárusuoma gaskkusteami, ovddimusat mánáide ja nuoraide. Dan čállá Finnmárkku fylkkagielda preassadieđáhusas.
– Lea hui illudahtti go mis dál lea sajis ođđa doarjjaortnet mainna beassat doarjut iešguđetlágan doaimmaid kvena/dárusuoma birrasis, lohká fylkkasátnejođiheaddji Ragnhild Vassvik.
– Mun háliidivččen ahte doarjjaortnet kvena/dárusuoma doaimmaid várás áiggi mielde ovdánivččii nana ja beaktilis gaskaoapmin, earret eará go mii ođđa Romssa ja Finnmárkku fylkan oažžut ovddasvástádusa doaimmahit nationála ortnega mii guoská seamma suorgái, loahpaha son preassadieđáhusas.
Doarjja juolluduvvo ásahusaide, organisašuvnnaide, joavkkuide/servviide, ovttaskas joavkkuide ja ovttaskas olbmuide.