Sámediggeráđđi juolluda 375.000 ruvnno doarjjan gávpevuođđudussii Store Tamsøy ANS:i Davvenjárgga gielddas. Ruđat galget mannat buktagiid ja vásihusaid ovddideapmái Dávdnesállas Porsáŋgguvuonas.
Store Tamsøy ANS doaibma lea dán rádjái leamaš luomečoaggin sullos Dávdnesállas (Store Tamsøy) Porsáŋggu gielddas. Gávpevuođđudus háliida eanet báikkálaš árvoháhkama luomečoaggimii lassin ja oaidná dál vejolašvuođa ovddidit eará doaimmaid Dávdnesálla historjjá vuođul ja dan vuođul gos dat lea.
Dan oktavuođas lea hávdanális deaŧalaš rolla, sihke uvjjaid ávkkástallama ektui, muhto maiddái dan ektui ahte gussiide addit buoret vásáhusa. Gávpevuođđudus háliida earret eará lágidit jahkásaš hávdaseminára, man sisdoallu sáhttá maiddái viiddiduvvot eará loddešlájaide. Galgá maiddái lágiduvvot seminára luonddu šattuid, biebmoráhkadeami jna birra.
– Jurdda ahte háhkat ollu árvvuid hávdanáli vuođul sullos, lea miellagiddevaš. Dat addá vejolašvuođa ávkkástallat uvjjaid, muhto maiddái geahččalit geasuhit eanet olbmuid galledit sullo. Vejolašvuohta ovddidit jurdaga viidáseappot eará meahccebuktagiid ávkkástallamii lea gelddolaš, dadjá sámediggeráđđi Silje Karine Muotka.
Lagas ovttasbargu dutkanbirrasiin
Store Tamsøy ANS háliida fállat mátkki ruovttoluotta áigái, go sihke orrun ja eallin muđui lei eaŋkileabbo. Gávpevuođđudus oaivvilda ahte leat stuorra vejolašvuođat, maid sii háliidit ovddidit lagas ovttasbargguin dutkanbirrasiin ja fágaolbmuiguin iešguđege áŋgiruššansurggiid siskkobealde.
– Dát lea ođđahutki ja gelddolaš gávpejurdda, mii sáhtášii váikkuhit dasa ahte buorránivččii beroštupmi olles regiovdnii ja máhttu dan birra, dadjá Muotka.
Doarjja addojuvvo doarjjaortnegis Doarjja ealáhusaide, fitnodatovddideapmái, lotnolas- ja meahcceealáhusaide, ja dat dávista vuoruhemiide. Dán jagi vuoruhuvvojit doaibmabijut mat addet ollu ođđaháhkama ja fitnodatovddideami, doaibmabijuide mat buoridit báikkálaš biebmu ja sámi guovlluid eará biebmobuktagiid gávpejođu, ja doaibmabijuide mat addet gánnáhahtti ásahemiid meahcceealáhusaid siskkobealde.
