Boazo Sámi Siida AS jođiheddjiin ledje aitto leamaš cruisefanasturisttat guossis go sámediggepresideanta Aili Keskitalo ja sámedikki ráđđeláhttu Silje Karine Muotka skuviheigga guossái ruhtaseahkain.
Berit Anne Sara Eira ja Kristine Nina N. E. Sara hirpmahuvaiga duođaš go sámedikkepolitihkkárat bođiiga geiget ruhtadoarjaga Boazo Sámi Siidda ođđa doibmii. Fitnodat áigu oainnat hukset ođđa visttiid go buot formálalaš bealit leat ortnegis. Keskitalo ja Muotka duođašteaba ahte prošeakta oažžu doarjaga, go lea ahtanuššan ovdaprošeavttas mii maid lea ožžon doarjaga earret eará Sámedikkis, muitala Aili Keskitalo Altapostenii.
Doarjagat movttiidahttán
Fitnodaga ovdánahttinplána boađus lea fitnodatmodealla mas leat čielga mihtut, ja jođiheaddjit leat vuoruhan doaibmabijuid man mielde ain ovdánahttet sámi mátkeealáhusfitnodaga.
– Mii leat movttiidan maŋŋil go Innovašuvdna Norga lea juolludan sihke loana ja doarjaga ođđa plánejuvvon áŋgiruššamii, muitala Berit Anne Sara Eira, guhte lea beaivválaš jođiheaddji Boazo Sámi Siiddas.
Prošeakta lea ráhkaduvvon ovttasráđiid Noodt og Reiding nammasaš konsuleantafitnodagain, ja fitnodagas lea ovdalaččas jo beannot miljovnna loatnan. Prošeakta oažžu maid miljovnna ruvdnosaš doarjaga Innovašuvdna Norggas ja Boazodoalo árvoháhkanprográmma bokte ges oažžu 517 duhát ruvdnosaš doarjaga.
Eanet go vihtta miljovnna
– Fitnodat galgá ovdánahttot feara mo. Earret eará sirdet rusttegiid eará tomtii, huksejit ođđa váldovistti, buoridit dálá rusttegiid ja álggahit ođđa doaimmaid mat gullet boazodollui ja sámi kultuvrii. Seammás áigot ovdánahttit gealbbu ja nannet fitnodaga organisašuvnna ja jođiheami, dadjá Silje Muotka.
– Dát lei buorre ođas, dál beassat joatkit plánaideamet ja háhkat bistevaš visttiid mat oktiibuot mákset 5,2 miljovnna, dadjá Nina N. E. Sara.
Fitnodat guossohii káfe ja sohkargáhkku Sámedikki ovddasteddjiide.
– Dán gáhkkui liikojit turisttat hirbmadit, muitala Berit Anne Altaposten áviisii.
