Sámediggi lea juolludan 600 000 ruvnno Plassje ja Dielddanuori mánáidgárddiide. Doarjja addo vai sáhttet viežžat liigegiellaresurssaid mánáidgárddiide. – Sámediggeráđđi dieđusge doarju Svaale ja Márkománát gielladoaimmaid.
Plassje Ysterhagan mánáidgárddi Svaale ossodat oažžu 300 000 ruvdnosaš doarjaga giellačeahppái, mii lea giellamovttiidahttinprošeakta man ulbmilin lea nannet ossodaga lullisámegielladoaimmaid.
Mánáidgárddis leat sámi ossodaga ásaheami rájes 2016:s leamaš stuorra hástalusat lullisámegielat mielbargiid rekrutteremiin. Dán jagi leat sii virgádan giellastimuláhtora, guhte bargá mánáiguin ovttas eará bargiiguin sámi ossodagas.
– Giellamohtiváhtor galgá movttiidahttit ja inspireret sihke mánáid ja bargiid lullisámegieldoaimmain. Giellamodeallaid nannen veahkeha ossodaga olahit mihtu mas lullisámegiella lea beaivválaš giellan, dadjá sámediggeráđđi Mikkel Eskil Mikkelsen (NSR). Sámediggi lea dieđusge veahkkin dan dehálaš barggus.
Čoahkkinastán Plassje suohkaniin
Plassje suohkan ja Sámediggi leat čoahkkinastán ságastallat mánáidgárddi hástalusaid birra.
– Sámediggi lea čoahkkinastán Plassje suohkaniin ságastallat hástalusaid mat leat mánáidgárddi sámegielgelbbolašvuođa rekrutteremiin. Dat juolludeapmi lea čoahkkima konkrehta čuovvuleapmi, ja mii sávvat dat sáhttá leat ávkin čoavdit rekrutterenhástalusaid oanehis áiggis, dadjá Mikkelsen.
Márkománák mánáidgárdi
Dielddanuori Márkománák sámi mánáidgárdái juolluduvvo 300 000 ruvdnosaš doarjja giellačeahppái, prošektii Giellanannen Márkománák sámi mánáidgárdi 2021. Prošeavtta ulbmilin lea gáhttet sámegiela doaibmi giellan nu, ahte áŋgiruššá mánáid giellaovdáneapmái, ja eastadit sámegiela jávkama guovllus nu ahte mánáidgárdemánát ožžot doaibmi sámegiela ovdal go álget skuvlii.
– Lassi giellaresurssain ožžot mánát, geain sámegiella lea ruovttugiellan, liigedoarjaga ovdánahttit gielaset iešguđetlágan mánáidgárdedoaimmaid bokte, dadjá sámediggeráđđi Mikkelsen. Mii dárbbašit boahtteáiggi giellaguddiid, ja dan vuođđun lea earret eará mánáidgárdi. Márkománák sámi mánáidgárdi áigu maiddái Sámedikki doarjagiin fállat mánáide, geain ii leat sámegiella ruovttugiellan, oahpahusa sámegielas nu ahte doaimmat leat heivehuvvon sin gielladássái. Dát čuovvu Váibmogiela čielggadeami, mas sámegielat mánáidgárddit adnojuvvojit dehálaš ovttaskas doaibmabidjun sihkkarastin dihtii sámegielaid gáhttema ja ealáskahttima, loahpaha Mikkelsen.
Doarjagat juolluduvvojit mánáidgárdeprošeavttat ja -ovdánahttindoaimmat doarjjaortnegiin. Dan ortnega mihttun lea alla kvalitehta sámegielas ja kulturdoaimmain mánáidgárddiin. 2020:s vuoruhuvvojit giellalávgunprošeavttat, báikkálaš ovdánahttinprošeavttat, ođđa mánáidgárdefálaldagaid ásaheamit ja doaibmabijut mat prošeavttaid bokte nannejit gielladoaimmaid nu go giellačeahppi.