Sámediggeráđđi lea juolludan doarjaga reaidduid investeremii.
Sámediggeráđđi lea juolludan 44 000 ruvdnosaš doarjaga Vuorji Rein AS:i.
Vuorji Rein AS Kárášjogas oažžu doarjaga Sámedikkis investeret reaidduid mat galget leat mielde ovddideamen fitnodaga. Fitnodat háliida investeret gávpevovnna mii galgá veahkehit márkanfievrridit ja vuovdit eanet buktagiid iešguđetge arenain. Sámediggi ii doarjjo vovnna oastima, muhto addá doarjaga reaidduide mat galget geavahuvvot vovnnas ja ođđa buktagiid ovddideapmái.
Prošeakta galgá ovddidit Vuorji Rein AS fitnodaga, nu ahte fitnodat sáhttá olahit stuorát márkana Norggas.
– Mii leat ilus doarjut Vuorji Rein AS áŋgiruššama ja sávvat ahte sii lihkostuvvet ovddidanbargguiguin, dadjá sámediggepresideanta Silje Karine Muotka (NSR) preassadieđáhusas.
Sámediggi addá doarjaga Lassiealáhus boazodoallu doarjjaortnega bokte. Vuorji Rein AS fitnodaga eaiggáduššet badjeolbmot, ja danne lea sis vejolašvuohta ohcat doarjaga dan ortnegis.
