Dál sáhttet eaktodáhtolašorganisašuvnnat, searvvit, skuvllaluohkát ohcat doarjaga Finnmárkku Olgodaddanráđis čorget jávre- ja johkagáttiid.
Finnmárkku Olgodaddanráđđi ovttas Davvi-Tromssa Olgodaddanráđiin leat ožžon miljovnna kruvnna doarjaga Birasgáhttendirektoráhtas čorget jávre- ja johkagáttiid.
Gielddat, organisašuvnnat, ja earát ávžžuhuvvojit oasálastit bargguide ja eastadit nuoskideame, čállá Perletur.no
Duđavaš go leat ožžon ruhtadeame
Birasgáhttendirektoráhta lea juohkán 80 miljovnna kruvnna doibmii, ja Davvi-Tromssa ja Finnmárkku Olgodaddanráđđi lea ožžon miljovnna kruvnna.
Olgodaddanráđi beaivválašjođiheaddji Hugo Tingvoll mielas lea illudahtti go leat ožžon ruhtadeame doibmii.
– Lea hui somá, ahte juolluduvvo ruhta gáddeguoračorgemii Davvi- Tromsii ja Finnmárkui. Dainna mii leat hui duđavačča. Lea stuorra dárbu dakkár doaimmaide ja čorgen bargu lea dehálaš. Mii diehtit miessemánnu ja geassemánnu lea dehálaš mánut dákkár bargguide. Dan sivas lea hoahpu johtui bidjat bargguid, mii válddiimet seammás oktavuođa iežamet 23 miellahtuin go oaččuimet dieđu ruhtadeame birra, dadjá son preassadieđáhusas.
Ohcanáigemearri ohcat doarjaga lea 27. beaivve dán mánu.
