– Norgga stáhta galgá gudnejahttit eamiálbmotvuoigatvuođaid, dadjá Suoma beale Sámedikki ságajođiheaddji, Tuomas Aslak Juuso.
– Doarjjun Norgga beale sámiid sin gáibádusain. Sámiide eamiálbmogin gullevaš rivttiid galgá gudnejahttit ja ollašuhttit eakti vuogi mielde. Fovsena dáhpáhusas Norgga stáhta galgá farggamusat ollašuhttit Alimusrievtti čovdosa, dadjá Juuso preassadieđu bokte.
Sámenuorat leat čájeheame mielaset Oslos Fovsena bieggamilluid vuostá. Miellačájáhus álggii duorastaga guovvamánu 23. beaivvi 500 beaivvi dan maŋŋá, go Alimusriekti gávnnahii duomus, ahte Fovsena bieggaturbiinnat leat huksejuvvon gustojeaddji doaibmalobi haga ja dat rihkkot sámiid rievtti hárjehit iežaset kultuvrra. Miellačájeheaddjit gáibidit Alimusrievtti duomu ollašuhttima ja 150 lobihis bieggaturbiinna galget njeidojuvvot.
