Suolovuomi gilisearvi oažžu 39 200 ruvnno FeFos.
Finnmárkkuopmodagas (FeFo) leat čieža doarjjaortnega. FeFo juolluda ruhtadoarjaga Suolovuomi gilisearvái FeFo Ovttasbargu nammasaš ortnega bokte – doarjjaortnet mas FeFo, ovttas eará aktevrraiguin, váldá ovddasvástádusa iešguđetlágan doaibmabijuin mat gusket FeFo-eatnamii.
– Vaikko nuoskkideapmi gullá nuoskkidanlága vuollái ja nu lea suohkana ovddasvástádus, de lea hirbmat buorre go Suolovuomi gilisearvi vuolggiha dákkár čorgenbarggu. Háliidan hástalit earáid ge dan dahkat gos oidnet dárbbu, lohká FeFo gulahallan ja servvodatoktavuođa jođiheaddji, Robert Greiner preassadieđáhusas.
Servodatdoaimmaide ruhta
Dán jagi lea FeFo várren 4,2 miljovnna ruvnno servodatávkkálaš ulbmiliidda Finnmárkkus. Earret eará leat juolludan miljovnna ruvnno Nordkapptrappa nammasaš prošektii ja 200 000 ruvnno sámi árbemáhttui.
– Ovdal manai badjelbáza Finnmárkku meahci hálddašeamis máttás. Dál bissu Finnmárkkus ja manná buriid báikkálaš ulbmiliidda. Mun ávžžuhan buohkaid iskat min doarjjaortnegiid ruovttusiiddusteamet, loahpaha Greiner.
