-Almmuhus-
OĐĐASATDoarjja bihtán­sámegillii ja girjjálašvuođa­doaimmaide

Doarjja bihtán­sámegillii ja girjjálašvuođa­doaimmaide

Journalista

-

-

Sámediggeráđđi juolluda 500 000 kruvnna doarjaga bihtánsámi giella- ja girjjálašvuođaprošeavttaide.

Vuođđudus Duoddara ráfe lea ožžon 300 000 kruvnna ortnegii Prosjektstøtte til samisk litteratur dahje Prošeaktadoarjja sámi girjjálašvuhtii. Dan prošeavttas galget jorgalit, prentehit ja almmuhit mánáid ja nuoraid girjjiid bihtánsámegillii ovttasráđiid Trøndelága fylkkagirjerádjosiin. 2024 ja 2025 áigodagas plánejit almmuhit oktiibuot guhtta girjji. Girjjit galget vuvdot ja márkanastojuvvot sihke Ruoŧa ja Norgga beale bihtánsámeguovllus.

– Lea hui unnán girjjálašvuohta bihtánsámegillii ja danin lea movttiidahtti vásihit ahte Duoddara ráfe ja Trøndelága fylkkagirjerájus gulahallet ovttasbarget dainna prošeavttain. Girjjálašvuohta ii leat dušše kulturpolitihkka, muhto maid giellapolitihkka. Jus mii galgat oažžut ealli giela, de lea dehálaš ahte gávdnojit girjjit olámuttos, lohká sámediggeráđđi  Mikkel Eskil Mikkelsen (NSR) preassadieđáhusas. 

Doarjja rádjarasttildaovttasbargui

Duoddara ráfe lea  maid ožžon 190 000 kruvnna prošektii «rádjárasttildangiellaovttasbargu bihtánsámeguovllus» Giellaovdánahttindoaimma doarjjaortnega bokte. Dát doarjja galgá geavahuvvot doaimmaide mat ovddidit bihtánsámegiela ovttasráđiid Sámi giellaforumiin Ruoŧa bealde bihtánsámeguovllus. Ulbmil lea ráhkadit plánaid mo sáhtášii nannet ovttasbarggu rastá riikkarájáid ja čoahkkinastit giellabirrasiiguin. Lea plánejuvvon lágidit njealje čoahkkima bihtánsámeguovllus, ja dasa lassin maiddái čoahkkinastit ásahusaiguin Giellatekno, Divvun ja Sámi Giellagáldu gos barget sámi gielaiguin.

– Bihtánsámegiella lea garrasit áiton jávkat, ja  jus galgat nagodit lasihit bihtánsámegielahálliid dáža bealde, de dárbbašat eanet ovttasbarggu bihtánsámegielhálliiguin Ruoŧa bealde, go doppe leat eanet olbmot geat máhttet dan. Stuorát giellaovttasbarggu bokte lea maid vejolaš iskat iešguđet bargoreaidduid ja oahppovugiid mat leat juo anus, loahpaha Mikkelsen.

-Almmuhus-