Sámediggeráđđi juolluda 835 000 ruvnnu sámi girjjálašvuođa almmuheapmái. Sin gaskkas geat dál ožžot doarjaga lea ođđa sámi girječálli.
Sámediggeráđđi juolluda 230 000 ruvnnu Gollegiella lágádussii davvisámegiel diktagirjji «Ándagassii Sápmi» almmuheapmái.
Lea Ánne Márjá Guttorm Graven gii dán diktagirjji lea čállán, mii lea jurddašuvvon nuoraide ja ollesolbmuide.
Girjjis leat fáttát mat gusket nuoraid hástalusaide eallimis, nu go ovdamearkka dihte iešsoardinváttisvuohta.
– Girjjis lea áigeguovdilis ja dehálaš fáddá, dadjá sámediggeráđi Henrik Olsen preassadieđáhusas.
– Mii dárbbašit eanet sámi girječálliid
Graven lea searvan «Čális fal» čálliohppui, man Sámediggi ovttas Sámi girječálliid servviin/Sámi dáiddárráđiin lea lágidan.
– Mii dárbbašit eanet sámi girječálliid, ja mun lean ilus go fas oaidnit ahte oažžut buriid mánusiid sis geat čađahit «Čális fal», dadjá Olsen.
Doarjja mánáidgirjjiide
Sámediggeráđđi lea maid juolludan 305 000 ruvnnu doarjaga Bárus SA lágádussii, guovtti girjái Nilla ja Ádegáhtu birra, maid Jens Martin Mienna lea čállán.
Girjjit leat jurddašuvvon gaskal golmma- ja gávcci jahkásaš mánáide.
– Mienna lea ásahuvvon girječálli geas lea earenoamáš ja gelddolaš čállinvuohki. Danne lea hávski go beassat doarjaga addit ođđa mánáidgirjjiide maid son lea čállán. Sámegillii leat unnán girjjit smávvamánáide geain leat luŋkkát ja eará válljenvejolašvuođat, ja danne váldit dáid girjjiid buriin mielain vuostá, dadjá Olsen.
Dasto oažžu Trööndelagen fylhkengærjagåetie/Trøndelag fylkesbibliotek 300 000 ruvnnu doarjaga jorgalit barggu bivnnuhis mánáidgirjjiid máttasámegillii.
Dál leat plánain 17 tihttela, ja lea vuoruhuvvon mihttomearri almmuhit eanet girjjiid boarrásat mánáide ja nuoraide.
Váldoáššis lea jietnagirjjiid jorgaleapmi máttasámegillii guovddážis, muhto dán jagi leat julev- ja bihtánsámi jorgaleamit maid plánejuvvon.
– Lea buorre veahkki girjjálašvuođa dahkamin olámuddui earenoamážit máttasámegillii, muhto maiddái eará sámegielaide, dadjá Olsen.
Ođđa ohcanáigemearri čakčat
Ođasin dán jagi lea ahte Sámedikkis dán jagi leat guokte ohcanáigemeari sámi girjjálašvuođa almmuheapmái.
Boahtte ohcanáigemearri sámi girjjálašvuođa buvttadeami doarjjaortnegis lea golggotmánu 1. beaivvi 2019.
– Mii doaivut oažžut máŋga buori ohcama nuppi vuorus maid, lohká Olsen.
Ohcanvuđot ortnegis girjjálašvuođa buvttadeapmái sáhttet lágádusat dahje fitnodagat ohcat mat eai oaččo njuolggadoarjaga lágádusdoibmii.
Sámediggi lea 2019:s maid juolludan njeallje miljovnna ruvnnu njuolggadoarjjan sámi lágádusaide sámi girjjálašvuođa almmuheapmái.
