Ávvir lea jearran iešguđet olbmuin Sámis mo sii ávvudit Sámi álbmotbeaivvi.
Rolf Morten Amundsen
– Álbmotbeaivvi čohkkán girdis, jođus Áltái gos meinen ovttas Felgen Orkesteriin doallat konseartta City Scenes bearjadaga, ja Prelatenis Romssas lávvordaga.
Athalie Karianne Lango
– Sámi álbmotbeaivvi cokkan gávtti ja ávvudan ovttas earáiguin FeFo visttis Leavnnjas. Manan bearrašiin borrat sámi árbevirolaš biepmuid ja gáhkuid. Somá deaivvadit ja humadit eatnigillii.
Erik Anders Sæter
– Lean NRK Sámis guovvamánu guđat beaivvi ja ávvudit doppe álbmotbeaivvi. Dađi bahábut lea mus reasta beaivi dievvan čoahkkimiiguin. Muhto soaittán beassat ávvudit eahkedis, gii dan diehtá?
Fred René Buljo
– Mus lea riegádanbeaivi dan beaivvi. Álggos mun lean Girkonjárggas, go lea konsearta iđđesbeaivvi. Maŋŋel dan mun manan Romsii girdiin, gos oassálasttán NRK Sámi sáddagis. Doppe mii ovdanbuktit áibbas ođđa lávlaga, mii lea ođđalágan luohti – ja lea ovttasbargu NRK Sámiin. Eahkes, maŋŋel barggu, soaittán beassat ávvudit riegádanbeaivvi ja álbmotbeaivvi.
Ivan Aleksander Buljo
– Dán jagi sádde NRK njuolggosáddaga Romssas Sámi álbmotbeaivvi oktavuođas, ja mun galggan doppe leat prográmmajođiheaddjin. Šaddá olu bargu sihke ovdal ja dalle go geavvá, muhto mun illudan dasa!
Jørgen Eira
– Lean Romssas bearjadaga , gos gálggan vázzit catwalka bivttasčájáhusas SiEvA Design ovddas, ja lávvordaga lean Álttás, gos maid galggan vázzit catwalka SiEvA ovddas.