Sámediggeráđđi Maja Kristine Jåma oassálasttii lullisámi dearvvašvuođakonferánssas 2023.
Mannan vahkus lágiduvvui lullisámi dearvvašvuođakonferánsa 2023 Skïeredes. Seminára váldoulbmil lea ovddidit heivehuvvon dearvvašvuođa- ja sosiálabálvalusaid sámiide lullisámi guovllus.
Fáddá vuosttaš beaivvi lei «Sisabahkkemat, vuoigatvuođat ja álbmotdearvvašvuohta – Mo váikkuhit proseassat mat leat jođus sámiid dearvvašvuhtii?», ja nuppi beaivvi fáddá lei «Dearvvašvuođabálvalusat sámi álbmogii». Sámediggeráđđi Maja Kristine Jåma doalai sáhkavuoru vuosttáš beaivvi ja searvvai panelaságastallamii, čállá Sámediggi Facebookas. .
– Sámediggi bargá viidáseappot sápmelaččaid hástalusaid čuvgemis barggu bokte ráđđehusain stuorradiggedieđáhusa oktavuođas álbmotdearvvašvuođa ja eallineavttuid birra, ja doaibmabijuid bokte mat buoridit dili. Sámediggi áigu maiddái váldit ovdan Duohtavuođa- ja soabahankommišuvnna raportta ja geahčadit sihke oanehis ja guhkesáiggi doaibmabijuid, dajai sámediggeráđđi.
