-Almmuhus-
VALÁŠTALLANDoaivva doalai gitta lohppii

Doaivva doalai gitta lohppii

-

-

Čieža jáhkasačča heargi «Suiva» vuittii Karasprinten 2015 gilvvuid Kárášjogas otne.

Otne lágiduvvui Karasprinten 2015, Fitnodatgeainnus Kárášjogas, heargi «Suiva» vuittii. Eaiggát Ana Maria Eira (7) Máze hearggit searvvis lei lihkolaš ja movttet go su heargi vuittii. Áddjá Isak A. Eira lei heargevuoddji.

– Doivon ja ledjen sihkkar ahte mu heargi vuoitá, lohká movttegis vuoiti. Hearggeeaiggát rápmo áddjás go lei nu čeahppi ja vuittii.

 

Vuosttaš sprinta

Son muitala áidobeliid ožžon hearggi ja ii leat guhká hárjehallan herggiin ovdal otná gilvui. Ana Maria Eira lohká iežas álgit vuodjit ja searvat gilvvuide go šaddá doarvái boaris. Suiva lea njealjje jáhkasaš heargi, ja lei vuosttaš sprinta gilvvuin gilvaleamen, ja lea dál gearggus Norgga meašttirgilvvuide Romssas boahtte jagi.

Fales heargi

Ana Maria Eira áddjá ja hárjánanvuoddji Isak A. Eira (52) mielas lei somá gilvalit ja velá vuoitit mánáidmáná herggiin. Isak A. Eira muitala iežas vuodján herggiin badjel 30 jagi.

 – Lei buorre šilju, vaikko lei veaháš njuoska siivu. Lei somá vuodjit fales herggiin. Lea leaktu vaikko álggus veaháš bázi, muhto de oaidná ruohttá buohta ja dikten dássái moala álggi lahkonit. Lea buorre dovdu dál, dadjá movttegis heargevuoddji. Eira muitala leat duđavažžan áiggiin mii lei 16.432 sekunda loahppavuorus, «Suiva» buoremus áigi otne lei 15.839.

 


VÁILLAHII GEHČČIID: Lágideaddji Per John Anti, lohká iežas duđavažžan gilvvuiguin, muhto váillahii eanet gehččiid doaluide.

Buorit áiggit

Buoremus áigi otná gilvvuin lei hearggis «Nigga:s » vuosttaš vuorus, 15.432 sekundda, ja bođiige nubbin loahppagilvvuin áiggiin 16.458. Karasprinten lágideaddji, Kárášjoga gilvoherggiid Per John Anti lohká otná gilvvuin leamašan buriid áiggiid, ja lea hui duđavaš váikko lohká váillahit eambbo gehččiid.

 – Lean veaháš duhtameahttun go eat ožžon eambbo gehččiid, fertet boahtte jahkái fuomášit boddodáhpáhusa mii geasuha olbmuid, lassin hearggegilvvuide, dadjá Anti.

Per John Anti muitala otná áiggit leat buoremus áiggit sin gilvvuin.

 - Jus livčče veháš buoret siivu otne de livčče soaitit boahtit máilmmiolahus dáid gilvvuin, dadjá Anti.

 

 

Heargi                 Eaiggát                 Vuoddji                         Searvi                        Áigi

«Suiva»              Ana Maria Eira      Isak A. Eira                      Máze hearggit          16.432

«Nigga»             Evelin Lensmann   Elen Anne Sara               Kaldoaivi                  16.458

«Hrubesch»       Lemet Aslat Eira    Nils Kay Ante Anti           Skuohtanjárga          16.575

«TR-Muzet»      Tom Rune Gaup    Anne Risten G. Sara       Favrosordda  (diskejuvvui go ii lean lávži gieđas)

-Almmuhus-