Ráđđehus lea geassán ruovttoluotta stuorradikkedieđáhusa mas ledje evttohan heaittihit geatnegasvuođa vuogádagaid dorskeguolásteddjiide.
– Dát debáhtta leamaš guhkit áigge juo ja Stuorradiggi ii leat nákcen soahpat áššis. Guolástanealáhusa dárbbuid geažil lea ráđđehus doahttalan geassit ruovttoluotta dieđáhusa, dadjá guolástusminister Per Sandberg.
Eai datge heaittit geatnegasvuođa vuogádagaid
Stuorradiggi dáhttui giđđat 2016:s ásahit kommišuvnna guorahallat dán golbma geatnegasvuođa, fálaldatgeatnegasvuođa (maiddái dovddus dego vuovdingeatnegasvuohta), gieđahallangeatnegasvuođa ja doaibmangeatnegasvuođa dorskeguolásteddjiide.
Kommišuvdna ovdanbuvttii raportta golggotmánu 2016:s, ja ráđđehus ovddidii geatnegasvuođa vuogádaga stuorradikkedieđáhusas njukčamánu 17, beaivve 2017.
Evttohii heaittihit
Stuorradikkedieđáhusas ovddidii ráđđehus heaittihit geatnegasvuođa vuogádagaid jus ealáhusa gorrelogu mielde buhtada daid.
– Geatnegasvuođa vuogádagat leat geahččaluvvon ja lea viggan heivehuvvot máŋggaid logiid jagiid, muhto dat ii leat doaibman. Min árvalusas sávaimet mii loahpalaš čielggadeami. Fertejit leat dássedis- ja einnostahtti rámmaeavttut, vai mis leat gánnáhahtti fitnodagat, ja birra jagi bargosajit ja servodatekonomalaš gánnáhahtti doaibma, dadjá Sanberg.
Doahttalit
Go ráđđehus geassá dieđáhusa de mielddisbuktá ahte eai leat evttohusat mo rievdadit geatnegasvuođaid. Dat mearkkaša ahte dálá njuolggadusmearrádus joatkašuvvá.
– Mii doahttalat ealáhusa mii lea geatnegasvuođa vuolde, ja eará guoskevaččaid. Go lea ain eahpesihkarvuohta mo boađus šaddá áššis, de ii leat geasage buorrin. Ealáhus dovdá bures dálá njuolggadusmearrádusa, dadjá guolástusminister Per Sandberg.
