DNB diehtojuohkindirektevra Even Westerveld duođašta ahte báŋkku foanda lea vuovdán ossosiid fitnodagain mat huksejit oljorevrre Dakota Access USA:s.
DNB diehtojuohkindirektevra Even Westerveld duođašta ahte báŋkku foanda lea vuovdán ossosiid fitnodagain mat huksejit oljorevrre Dakota Access USA:s.
Sivvan lea go gažaldagat leat čuožžilan álgoálbmogiid ektui ovtta guovllus gos revre galgá leat. Revre galgá biddjot joga rastá gos Standing Rock Sioux álbmoga juhkančáhci lea.
DNB-foandda ossosiin lea árvu 3 miljovnna dollára (26 miljovnna Norgga ruvnno), čállá Aftenposten.
Illudahtti vuosttaš lávki
Framtiden i våre hender searvvi jođiheaddji Arild Hermstad lea duhtavaš go DNB vuovdá ossosiid.
– Lea illudahtti vuosttaš lávki eret Dakota Accessas. Geassádeapmi lea hui unna oasáš DNB čanastagas. Mii vuordit ahte DNB geassáda oalát prošeavttas, dadjá son Aftenpostenii.
Logi proseantta ruhtadan
DNB lea golmma loana bokte ruhtadan revrre 2,8 miljárdda ruvnnuin, mii lea dušše 10 proseantta prošeavtta golahusrámmas.
– Mii leat sorjjasmeahttumit árvvoštallan movt eamiálbmogiid rievttit vuhtii váldojuvvojit proseassas. Dasa lassin leat mii nannen gulahallama kundariiguin vai geavahit min báŋkoposišuvnna váikkuhit čovdosa riidui, muitala Westerveld Aftenpostenii.
Son oaidná čielga erohusa ossosiid vuovdimis ja olles loana vuovdimis.
– Lea hui álki vuovdit unnit ossosiid børsačálihuvvon fitnodagain. Lea ollu eanet gáibideaddji ja áddjás bargu vuovdit loana mii lea addon dakkár prošektii, go vuos ferte gávdnot oasti, muitala Westerveld Aftenpostenii.
