Guokte nissona gáibideigga 16 miljovnna buhtadusa Divttasvuona suohkanis, muhto soai eaba vuoitán dikkis. Nissonat oaivvildeaba ahte suohkan ii leat doaimmahan barggu mii guoská fuolahusváilái.
– Diggi lea gávnnahan ahte suohkan ii leat boastut bargan, dieđiha nissonolbmuid advokáhtta Sicilie Kanebog NRK:i.
Lohká passiivan leamaš áššis
Son lohká Ofuohta diggegotti deattuhan ahte Divttasvuona suohkan lea bargan dan maid sáhttet bargat, ja ahte dan guokte nissona ássandilli lea dohkálaččat čuovvoluvvon.
Kanebog oaivvilda ahte suohkan ja mánáidsuodjalus leat passiivvat leamaš dán áššis, ja ahte doaimmat maid suohkan álggahii, eai dahkan nieiddaide buoret dili.
– Mii leat beahtahallan, heađástuvvan ja suhttan, lohká Kanebog.
Eai mieđihan ovddasvástádusa
Dikkis muitalii Kanebog ahte sii geahččaledje gulahallat suohkaniin ovdal go váide, muhto golle sullii logi mánu ovdal go suohkan vástidii.
Suohkan hilggui ávžžuhusa mas mieđihit dan ovddasvástádusa, čálii NRK skábmamánus diibmá.
Sihke mánáidsuodjalus ja politiijat ožžo dieđu ahte nieiddat leigga vásihan rohcošeami, muhto suohkana advokáhtta, Roald Angell, lea čađat čuoččuhan ahte mánát oaččuiga dohkálaš čuovvoleami suohkana bealis, ja ahte suohkanis ii leat buhtadusovddasvástádus.
Nubbi ášši maid vuite dikkis
Dá lea nubbi buhtadusášši Divttasvuona suohkana vuostá, mii lea ilbman maŋŋel go rohcošanáššit almmustuvve, go 11 nissona ja dievddu muitaledje VG aviissas 2016:s ahte ledje vásihan rohcošemiid.
Borgemánus vuittii suohkan vuosttaš diggeášši mii guoská buhtadusaide.
Diggegoddi oaivvildii ahte áššečuoččuheaddji ii lean nagodan duođaštit suohkana eahpedohkálaš barggu.
Hålogalándda lágamánneriekti lea hilgon guoddaleami.
(©NTB)
