Muhtun dievdu lea dubmehallan njealji jahkái giddagassii go galgá veagalváldán nissonolbmo Divttasvuonas.
Muhtun dievdu lea dubmehallan njealji jahkái giddagassii go galgá veagalváldán nissonolbmo Divttasvuonas.
Duopmu lea beannot jagi eambbo go áktora čuoččuhus.
Dasa lassin ferte dievdu máksit 200 000 ruvnno buhtadussan seamma ahkásaš nissonolbmui. Nisu galgá psyhkalaččat doaimmashehttejuvvon.
Njeallje jagi
Ášši lei Ofuohta diggegottis ođđajagemánu.
Dalle logai politiijaadvokáhtta Siv Remen ahte heivvolaš ráŋggáštus lea njeallje jagi, muhto go ášši lea nu guhká jorran ovdal go ollii diggái, de berrešii duopmu leat bealgoalmmát jagi giddagassii. Duomus čállá diggegoddi ahte dievdu goit ge dubmehallá njealji jahkái.
– Eará go áššemeannudanáiggi, de ii gávnna diggi makkár ge osiid áššis mat galggaše addit unnit duomu, čállá diggegotti duopmár Øivind Johnsen duomus.
Jáhkke nissonii
– Lean hui ilus go diggi lea jáhkkán gillájeaddjái, lohká politiijaadvokáhtta Siv Remen preassadieđáhusas.
Son lohká ahte lea dehálaš ahte buot duođaštusat leat oassin árvvoštallamis, go dá lea ášši gos gillájeaddji ii nagot albma ládje čilget.
Vaikko áššáskuhttimis dušše leat rohcošeamit 2008 rájes 2011 rádjái. Remen deattuha ahte rohcošeamit leat dáhpáhuvvan 1980-logu rájes.
Psyhkalaččat doaimmashehttejuvvon
Dievddu dubmejedje go galgá alcces ávkin dan atnán go nisu lei psyhkalaččat doaimmashehttejuvvon.
Duomus boahtá ovdan ahte rohcošeamit leat dáhpáhuvvan 2008 čakčamánu rájes gitta 2011 skábmamánnui, muhtun gilážis Divttasvuonas.
Nisu čilgii ahte leat olu anašeamit leamaš 80-logu rájes juo. Dan dihte dievdu ii lean áššáskuhtton, muhto diggi lohká ahte lea oassin obbalaš duođašteamis.
Guhtta jagi
Ášši váidojuvvui 2011:s. Guhtta jagi maŋŋil lei easka ášši dikkis. Remen mieđihii ahte dat rihkku europealaš olmmošvuoigatvuohtasoahpamuša.
Dievdu lea čađat čuoččuhan iežas vigiheapmin, ja ahte ii leat goasse ovttastallan ge nissonolbmuin. Su bealušteaddji, Alf Martin Solvin, fas lea moaitán politiijaid áigegeavaheami.
Son lea maid čujuhan dasa go eai gávdno DNA-duođaštusat ja ahte ii leat čielgasit boahtán ovdan goas ja man dávjá rohcošeamit galget dáhpáhuvvan.
Nubbi
Dá lea nubbi ášši mii lea dikkis dan nu gohčoduvvon Divttasvuona áššis.
Mannan juovlamánu dubmehalai muhtun eará 40-jahkásaš dievdu bealguđat jahkái giddagassii go galgá rohcošan viđain nissonolbmuni.
Goappaš bealit guoddaledje dan duomu.
