Diibmá dárkkistii Stáda geaidnodoaimmahat 250 000 vuojániin boagán- ja jealbmageavaheami. Boađusin dás ledje 2189 sáhku ja 38 váidima.
Stáda geaidnodoaimmahaga lihkohisvuođaguorahallamat leat čájehan ahte 35 proseantta sis geat leat johtolagas duššan eai leat atnán boahkána.
– Eatnasat geaiguin mii deaivvadit dárkkisteamis geavahit boahkána ja oaivesuoji, muhto 2189 sáhku leat dattetge beare ollu, muitala Kjetil Wigdel, gii lea dárkkistemiid ossodatdirektevra.
Čeahpit sihkkarastit mánáid
Johtolatsihkarvuođa ossodatdirektevra Guro Ranes muitala ahte Norggas leat olbmot čeahpit sihkkarastit mánáid go leat vuodjime. Dát čajehuvvo maid das ahte ii oktage mánná duššan biillas diibmá.
– Dattetge lea duođalaš ja lobiheapme go muhtun váhnemat ja rávisolbmot eai sihkkarastte máná. Ii mihkkege leat nu divrras go mánná, ja lea vuoddji ovddasvástádus sin bearráigeahččat johtolagas.
Eatnasat geat sáhkkohallet leat biilavuoddjit
Stádageaidnodoaimmahat dieđiha ahte hárve vuhttet go olbmot eai geavat oaivesuoji go vudjet mopedain ja mohtorsihkkeliin. Danin leat eanas biilavuoddjit geat sáhkkohallet go eai ane boahkána.
Jus gávnnahallá biilaboahkána haga dárkkisteamis, de sáhttá sáhkkohallat 1500 ruvnnuin.
– Vaikko eatnasat atnet boahkána, de lea goitge hirpmástuhtti go nu oallugat eai daga dan. Mii han diehtit ahte lea hirbmat ávkin jus de geavvá lihkohisvuhtii, loahpaha Wigdel.
