Ikte álge divvut riikkageainnu 94 gaskkal Skáiddi ja Hammerfeastta. Maŋimuš vahkkuid lea entreprenevrafitnodat buktán rusttegiid Skáiddi guvlui ja ráhkkanan bargui, muhto dás rájes de divvugohtet olles leavttuin.
Ikte álge divvut riikkageainnu 94 gaskkal Skáiddi ja Hammerfeastta. Maŋimuš vahkkuid lea entreprenevrafitnodat buktán rusttegiid Skáiddi guvlui ja ráhkkanan bargui, muhto dás rájes de divvugohtet olles leavttuin.
Dan áiggis go divodeapmi bistá de gaskkohagaid vuoliduvvo leaktomearri, dasa lassin stivrejit maid johtolaga johtolatčuovggaiguin. Ráhkaduvvojit maid gaskaboddosaš garvinluottat dan botta go huksejit šalddiid Skuggelvas ja Fállejogas.
Viiddis prošeakta
Skáiddi ja Hammerfeastta gaska lea vuosttaš oassi viiddis riikkageaidnoprošeavttas E6:s gitta Hammerfeastta gávpogii, dát gaska lea birrasiid guhtta miilla guhko.
Geaidnu lea oassi Álttá-Hammerfeastta gaskkas, mii adno leat oktan guđa áhtanuššanguovlluin Davvi-Norggas johtolatetáhta Davviguovllodieđáhusas. Dát geaidnu lea dehálaš sihke ealáhusaid ja buhcciid fievrredeami oktavuođas Finnmárkkus.
Riikkageainnu 94 alde dávjá dáhpáhuvvet lihkohisvuođat, das leat olu baskkes gaskkat. Dál geaidnu galgá viiddiduvvot nu ahte gártá 8,5 mehter govddo, mohkiid áigut njulget ja uđasvárraguovlluid áigot sihkkarastit.
Báikkálaš fitnodat
Álttá fitnodat Anlegg Nord AS:s dat galgá divodit vuosttaš oasi dán prošeavttas, 5 kilomehter guhko gaska Skáiddis Skuggelvii.
Dáinna galget geargan 2016 čavčča. Fitnodagas lea dasa lassin opšuvdnašiehtadus viidát bargguin gitta Arisberg rádjai.
– Mii leat hui duđavaččat go báikkálaš entreprenevra sáhttá váldit badjelasas dán barggu, gilvovuoimmálaš haddái, dadjá Stáhta geaidnodoaimmahaga guovllugeaidnohoavda Torbjørn Naimak.
Dađistaga divodit
Oktiibuot leat rehkenastán máksit 235 miljovnna geainnu divvut Skáiddi ja Hammerfeastta gaskka. Dál leat bargamin regulerenplánaiguin golmma boahtte oassái.
Našunála johtolatplánas lea várrejuvvon 550 miljovnna ruvnnu riikkageainnu 94 várás 2018-2023 áigodahkii. Dál dattege lea jo čielggas ahte prošeakta šaddá divraseabbon ja Stáhta geaidnodoaimmahat lea ođđasit rehkenastimin.
Guovllugeaidnohoavda Torbjørn Naimak dadjá ahte eai divot geainnu maŋŋálaga, muhto sirddašit báikkis báikái. Maŋŋil go leat divvon geainnu Arisbergii de eai joatkke das divvut davvelii.
– Mii vuoruhat dan oasi gos lea stuorámus dárbu ovddemus. Orro jierpmáleamos joatkit dainna gaskkain mii lea lagamus Hammerfeastta gávpoga, dadjá guovllugeaidnohoavda.
