Vuolla ja bruvsa bukte stáhtii bealle miljárdabeali lassi divatsisaboađu.
Divatsisaboahtu lassánii maŋŋá go ráját giddanedje. Dat boahtá ovdan Bryggeri- ja drikkevareforeningen (BROD) loguin.
Ruhtavallji stáhtii
Sotnabeaivvi almmuhii searvi suoidnemánu vuovdinstatistihka. Dat čájeha ahte Ruoŧa rájá gidden buvttii ođđa vuovdinolahusa. Bruvsavuovdin lassánii 54,7 proseanttain ja vuollavuovdin lassánii 20,3 proseanttain.
Searvi čállá preassadieđáhusa bokte ahte stáhta ii goassege leat ožžon nu stuorra divatsisaboađu juhkamuččas ovdal. Sii leat rehkenastán makkár divatsisaboahtomearkkašupmi dat lea stáhtii. Diimmá ektui lea vuolla okto buktán 318 miljovnna ruvnno lassi dietnasa. Dasa lassin lea bruvsadivat lassánan 85 miljovnnain diimmá ektui. Bryggeri- ja drikkevareforeningen direktevra Erlend Vagnild Fuglum meroštallá ahte jus rehkenastá eará divadiiguin ja momssain, de lea stáhta divadiid bokte dinen 700 miljovnna ruvnnu.
Suoidnemánu vuovdinstatistihkka
– Buvddain vásihit 20,3 proseantta lassáneami vuollavuovdimis.
– Smávvaskálábryggeriijain lea vuollavuovdin lassánan 28,9 proseanttain.
– Olgobáikkit rahčet ain, muhto vásihedje suoidnemánus lassáneami.
– Čáhcevuovdin njieiai 4,1 proseanttain, muhto jus geahččá obbalaččat geassemánu ja suoidnemánu logu, de lea dat 20 proseantta lassáneapmi.
– Energiijajuhkosat lea lassánan 43,3 proseanttain.
– Stuorámus lassáeapmi lei bruvssas. Sohkarkeahtes juhkamuš lassánii 60,5 proseanttain.
