-Almmuhus-
OĐĐASATDirektevra fárre ruoktot

Direktevra fárre ruoktot

-

-

Finnmárkku buohcciviesu direktevra Torbjørn Aas heaitá virggis ja lávke nuppi direktevravirgái Davvi-Trøndelága Dearvvašvuođas.

Aas lohká iežas movttegin, muhto lea maid váivi.

– Finnmárkku buohcciviessu bargá buori barggu, ja ovdáneapmi manná dan guvlui ahte kvalitehta ain buorrána. Dasa lassin lea mis buorre ekonomiijastivrejupmi, mii lea dehálaš dál go galgat čađahit dehálaš huksenprošeavttaid. Livččen áinnas háliidan leat mielde viidáset, ovttas daiguin fiinna bargoustibiiguin Finnmárkku buohcciviesus. Dasa lassin lean ilus go lean ožžon barggu Davvi-Trøndelágas, ja illudan fárret ruoktot Trøndelágii, dadjá Aas preassadieđáhusas man Finnmárkku buohcciviessu lea sádden.

 

Ohcagoahtán ođđa direktevrra

Finnmárkku buohcciviesu stivrajođiheaddji, Ulf Syversen, lea jo ohcagoahtán olbmo direktevravirgái.

– Mii leat buoret dilis go ovdal. Mis lea buorre jođihanjoavku ja buorre ruhtadilli. Galgá mannat bures molsut direktevrra dan dihte. Ođđa direktevra ii dárbbat stuora rievdadusaid čađahit. Lea leamaš buorre áigodat go Torbjørn lei direktevra, ja lea šállu go dál heaitá. Direktevrras lea vihtta mánu eretcealkináigi, muhto sávan ahte Torbjørn ii šatta dárbbatmeahttun guhkes áiggi bargat eretcealkináigodagas. Mii leat sáddeme dieđuid rekrutterenfitnodagaide ja bidjat johtui barggu gávdnat ođđa direktevrra, ja ođđajagis mii ásahit bargojearahallanlávdegotti, muitala Syversen.

-Almmuhus-