Fállejohkalaš Finn Hågen Krogh lea birgen bures čuoiganláhttus dán dálvvi, ja danin oažžu nubbin eanemus ruhtaskeaŋkkaid Norgga dievdočuigiid gaska.
Sápmelaš Finn Hågen Krogh vuittii dán dálvvi máilmmicupa sprinttačuoigamii vuohččan, dakka maŋŋel faskii maiddái vuoittu vuosttaš gearddi gaskačuoigamiin. Go áigodaga lohppii olliimet, de vuittii son obbalaš sprinttacupa. Ruhtaskeaŋkkat devdet fállejohkalačča báŋkokontoi go birge bures čuoiganláhttus, čállá Kronstadposten.
Nubbin eanemus
FIS logut čájehit man olu dievdočuoigit leat ožžon ruhtaskeaŋkan vássán dálvvi. Martin Johnsrud Sundby dinii eanemus go oaččui skeaŋkan oktiibuot 1.339.000 ruvnnu, nuppi sajis lea Finn Hågen Krogh gii oaččui 727.000 ruvnnu skeaŋkan. Dat mearkkaša ahte Krogh lea skeaŋkkaid vuođul dinen eanet go Petter Northug, gii oaččui goalmmát eanemus, nammalassii oktiibuot 705.000 ruvnnu. Dattege lea Northug gii dine eanemusat ruhtadeddjiin.
