-Almmuhus-
-Almmuhus-
OĐĐASAT Diŋgui masá 80 gr. marihuana poastta mielde

Diŋgui masá 80 gr. marihuana poastta mielde

-

-

27-jahkásaš čilgii dikkis ahte geavaha gárrenmirkkuid oađđinváttisvuođaid geažil.

Guovdageaidnulaš diŋgui ja oaččui poasta mielde marihuana diibmá. Oktiibuot lea 27-jahkásaš dievdu diŋgon unnimusat 79 grámma marihuana muhtin oahppásis Mátta-Norggas, oahpis sáddii narkotihka poasta mielde unnimusat čieža gearddi.

Miehtá geavahan marihuana

Sis-Finnmárkku diggegottis mieđai 27-jahkásaš diŋgon ja geavahan marihuana. Dievdu čilgii dikkis ahte vásihii traumáhtalaš dáhpáhusa golmma jagi áigi ja ahte dan rájes leamaš sus oađđinváttisvuođat, son geavaha marihuana vai bálle oađđit. Son muitalii maiddái dikkis ahte lea diŋgon eanet gárrenmirkkuid maid politiijat eai leat duoguštan, dasa lassin muitalii ain muhtumin geavahit marihuana dárbbu geažil.

Gáibidii giddagasduomu

Marihuana fievrrideapmi poasta bokte dáhpáhuvai ođđajagimánus gitta čakčamánnui diibmá. Áktor gáibidii giddagasduomu ja árvvoštalai 40 beaivvi giddagasas muttágis ráŋggáštussan. Bealušteaddji oaivvildii ge ahte almmái ii ánssáš nu garra duomu.

Servodatráŋggáštus

Sis-Finnmárkku diggegoddi oaivvilda ahte servodatráŋggáštusat lea buoret váikkuhus go giddagasas, diggi deattuha ahte almmái lea miehtan dágus ja son dáhtu ohcat veahki iežas psykalaš váttisvuođaide. 27-jahkásaš dubmehallá 40 diibmui servodatráŋggáštussii man galgá čađahit 60 beaivvis. Jus ráŋggáštusdoaibma ii čađahuvvo, de gártá 40 beaivái giddagassii.

- Advertisement -
-Almmuhus-