-Almmuhus-
-Almmuhus-
OĐĐASATDiŋgo­gohte luopmo­mátkkiid go gulle vaksiinna birra

Diŋgo­gohte luopmo­mátkkiid go gulle vaksiinna birra

-

-

Go vaksiidnaođas bođii, de luovvanii luopmomátkkiid vuovdin máŋgga Eurohpá riikkas, muhto Norggas lea vuovdin mannan njozet. 

– Dát jahki dieđusge ii leat nu go eará gávpejagit, ja hivvodat lea ain vuollegaš. Muhto mii oaidnit positiiva treandda, mátkkoštanmokta boahtá fas ja olbmot plánegohtet ja gehččet ovddos guvlui, dadjá gulahallanvásttolaš Nora Aspegren TUI-mátkefitnodagas Norggas NTB:i.

Globála mátkefitnodat TUI buohtastahttá gávpeloguid Norggas maŋimuš guovtti vahkkus vahkkuiguin ovdalaččas, go lei hui jaskat. Luopmomátkkiid vuovdin boahtte jahkái lea lassánan 111 proseanttain, ja lassáneapmi boahtte dálvái lea 262 proseanttain.

Sii eai dieđit galle mátkki sii leat vuovdán.

Dán jagáš luopmu lea sirdon boahtte jahkái

Fáktora mii dáidá vuolidit vuovdima buohtastahtton diimmá loguiguin, lea ahte oallugat leat diŋgon luomu ovdalaččas – man leat válljen sirdit boahtte jahkái ovdalii go buhtadit goluid.

Ráđđehusa preassakonferánssas gaskavahkku jearai NTB lea go jirbmái norgalaččain diŋgogoahtit luomu dál jo.

– Dan ferte juohkehaš árvvoštallat ieš. Muhto mii árvvoštallat ahte mii fertet eallit pandemiijain boahtte jagi maiddái. Jus manná bures vaksiinnain, sihke dohkkeheamis, buvttadeamis, juohkašumiin, de sáhttá boahtte geassi leat earálágan go mannan geassi, dadjá dearvvašvuođa- ja fuolahusministtar Bent Høie (O).

Diŋgonmáhcahusdáhkádus

– Mun livččen goit háhkan buori diŋgonmáhcahusdáhkádusa, dadjá stáhtaministtar Erna Solberg (O).

Høie muittuha ahte ferte muitit go pláne, ahte dilálašvuohta lea earálágan iešguđet riikkain.

– Dađi bahábut lea nu ahte mii leat dakkár dilis gos guhkesáiggeplánen lea váddáset go ovdal lea leamaš, lasiha Høie.

(©NTB)

-Almmuhus-