Heađásnuvvan boazoeaiggádat vásihit stuora vahágiid go goaskimat goddet ruksesmisiid. Dál lea NBR reageren.
Boazoeaiggádat gávdnet beaivválaččat čukkohallan dahje goddon misiid.
Vahát lea šaddagoahtán nu stuorisin ahte eai dieđe šat maid galget bargat.
Heađásnuvvan
Heađásnuvvan boazoeaiggádat vásihit stuora vahága go goaskin goddá ruksesmisiid.
Guoddin lea jur aiddo álgán, ja dilálašvuohta lea dramáhtalaš. Jus ná joatká, de eai ceavzze beare galle miesi:
– Dál lea doarvai. Goaskinnálli vearáska, ja dat áidna vejolašvuohta hehttet miessevahága, lea addit lobi báhčit nu ahte miessevahágat unnot, dadjá NBR-jođiheaddji, Ellinor Marita Jåma.
Miessevahát stuorru
Boazoeaiggádat oaivvildit ahte miessevahát stuorru jagis jahkái.
– NBR ii sáhte šat dohkkehit ahte boazoeaiggádat galget biebmat goaskimiid iežaset misiiguin. Mii leat máŋgii váldan dán duođalaš ášši ovdan eiseváldiiguin, muhto orru čájehuvvome ahte sin bealis ii dahkko mihkke áššiin. Jus eiseválddit eai farggamusat álggat doaimma mii buorida dilálašvuođa, de fertejit boazoeaiggádat ieža álggahit doaimmaid várjalan dihte iežaset opmodaga, loahpaha Jåma.
