Romssa ja Finnmárkku buohcceviesuin leat oktiibuot gávcci koronabuohcci. Riikadásis ožžot badjel 300 olbmo divššu buohcceviesuin.
Ođđajagimánu 5. beaivvi dieđiha Davvi-Norgga universitehtabuohcceviessu ahte sii dikšot guhtta koronabuohcci Romssas ja ovtta koronabuohcci Hášttain.
Finnmárkkubuohcceviesus ges lea okta koronapasieanta, ja son lea sisačálihuvvon Hámmerfeastta buohccevissui.
Romssa ja Finnmárkku buohcceviesuin leat sakka unnit koronabuohccit go skábmamánu loahpageahčen, go muhtin beivviid dikšo 36 koronabuohcci oktanaga.
Norgga buohcceviesuin ledje oktiibuot 304 koronapasieanta ođđajagimánu 4. beaivvi. 95 koronabuohcci ožžo divššu intensiivaossodagain ja 68:s dáin ožžo vuoigŋanveahki, čájehit Dearvvašvuođadirektoráhta logut.
